A Deputación de Pontevedra, a través de SmartPeme, oferta esta próxima semana novas accións formativas online, da súa carteira de obradoiros. Nos talleres explicarán que é o malware, a factura electrónica, o CRO, ferramentas dixitais para hostalaría, tecnoloxía blockchain e bitcoins, plan de márketing dixital ou posicionamento SEO.
Este luns 19 de setembro, Manuel Freire, Experto Universitario en Robótica, Programación e Impresión 3D, impartirá o taller “Ciberseguridade – Qué é o Malware” co que se inicia unha serie de talleres co obxectivo de dar a coñecer o Malware, que tipos de Malware empregan os ciberdelincuentes ou como podemos saber se estamos infectados dun.
O martes 20, terá lugar a acción “Como facturar electronicamente para as empresas e administracións públicas”. Este obradoiro ten como obxectivo demostrar que a factura electrónica é unha solución máis económica e eficaz que a factura convencional, reducindo custos (papel, medios de comunicación, etc.) e tempo de xestión administrativa de calquera autónomo ou empresario. O encargado de conducilo será Jose Luís Taboada, enxeñeiro Informático con máis de 20 anos de experiencia e especializado en sistemas informáticos.
O mércores 21 de setembro, na quenda da mañá, Esther Garcinuño, Diplomada en Ciencias Empresariais impartirá o taller “CRO: como mellorar as ventas da túa web”. Neste obradoiro analizarase este concepto, aprenderase a identificar por que os usuarios non converten no sitio web ou o coñecemento de técnicas básicas para transformar visitantes en clientes. Pola tarde, Sonia Torres, Técnica de Empresas e Actividades Turísticas versará sobre “Ferramentas dixitais para restauración e hostalería”. As ferramentas dixitais convertéronse nun aliado imprescindible para a reapertura e competitividade dos establecementos de restauración. Aportan solucións para a promoción, comercialización, distribución, xestión, seguridade ou experiencia dos usuarios.
O xoves 22 ofrécense tamén 2 obradoiros. O primeiro será as “Blockchain e criptomoedas“ pola mañá, co que se inicia unha serie de catro obradoiros informativos sobre a tecnoloxía blockchain. No primeiro destes obradoiros veremos en que consiste a tecnoloxía blockchain e como grazas a ela estamos ante o que se chama “o internet do valor”: unha forma de transmitir valor a través da rede. O obradoiro será impartido, de novo, polo experto Manuel Freire. A segunda formación será a partir das 17.00 h, no que Adrián Fernández, Licenciado en Comunicación pola Universidade de Barcelona, ensinará que é un plan de márketing dixital, a súa importancia, para que serve e como crear o noso paso a paso cun exemplo real, no curso: “O teu plan de márketing dixital paso a paso”.
Finalmente, o venres 23 celebrarase o derradeiro dos obradoiros. Laura Carrera, Graduada en Publicidade e Relacións Públicas versará sobre “SEO para redes sociais”. Neste taller ensinarase a mellorar o posicionamento SEO dunha web grazas ás redes sociais.
