16.1 C
Pontevedra
Sábado, 18 de Maio de 2024
Máis
    HomeÉ NoticiaO Museo de Pontevedra acolle o ‘X Encontro de Conservación e Restauración’

    O Museo de Pontevedra acolle o ‘X Encontro de Conservación e Restauración’

    Están a asistir 120 persoas de maneira presencial e outras 90 en liña dende Italia, Bélxica, EE UU, Brasil, Bolivia ou Exipto

    O ‘X Encontro de Conservación e Restauración’ que este ano se centra na ‘Xestión de riscos e emerxencias no Patrimonio Cultural’ comezou onte no Museo de Pontevedra coa intervención Ángel Luis de Sousa Seibane, da Dirección Xeral de Belas Artes do Ministerio de Cultura e Deporte, quen subliñou o cambio drástico de valor que ten o patrimonio cultural na xestión das emerxencias dende apenas hai unha década, cando sucederon os terremotos de Lorca (Murcia): de ser secundario pasou a ter a mesma consideración que as infraestruturas e as telecomunicacións.

    Así o manifestou na súa conferencia ‘A xestión de riscos e emerxencias no patrimonio cultural; xénese e evolución dos instrumentos e estratexias, desde Lorca ao Plan Nacional de Emerxencias e Xestión de Riscos’, na que fixo un percorrido pola evolución sobre os instrumentos e estratexias coas que se dotaron as administracións públicas españolas para tratar con situacións imprevistas ou catástrofes naturais que podían afectar ao patrimonio.

    De Sousa demostrou que Lorca significou antes e despois na política de protección do patrimonio cultural. Explicou que dende 2009 o Ministerio de Cultura sabía da necesidade de crear un equipo interdisciplinar disposto a actuar de forma inmediata en situacións de emerxencia, creouno en 2010 e seis meses despois aconteceu a sucesión dos terremotos en Murcia.

    Explicou que grazas ao deseño do Plan de recuperación do patrimonio cultural que fixo a Unidade de Emerxencias estableceuse un debate sobre todo coa Delegación do Goberno de Murcia e Protección Civil sobre o concepto de emerxencia, que para eles e ata entón só abarcaba a posta en seguridade das persoas, mais non a posta en seguridade dos bens culturais como obriga a Constitución. “Ata Lorca ningunha administración pública de ningún nivel consideraba unha prioridade a protección do patrimonio cultural en situacións de emerxencia. A partir de Lorca logrouse ampliar o concepto de emerxencia e considerouse a protección do patrimonio cultural, supeditada á atención da poboación, ao mesmo nivel que a de recuperación de infraestruturas ou telecomunicacións. Ao ano seguinte en 2012 encomendouse ao Ministerio de Cultura o Plan de coordinación e apoio para a protección de bens culturais en caso de emerxencia. E dende entón o patrimonio cultural foise incorporando na xestión das emerxencias”, subliñou.

    Os plans de salvagarda e a formación do persoal de emerxencias

    O técnico do Ministerio tamén falou das liñas de actuación do Plan Nacional de Emerxencias, dende os programas de documentación aos de formación, a  creación de unidades de emerxencia nas comunidades autónomas ata a ferramenta fundamental na que se vai basear a política do futuro en canto a protección de patrimonio: os plans de salvagarda.

    Falou do problema fundamental destes plans, que é a súa implantación, porque non só interveñen os medios propios da institución cultural afectada en cada caso, senón tamén axentes externos como Policía Local, Bombeiros, Protección Civil, SUMA, ou as forzas e corpos de seguridade do Estado, que teñen que actuar cando a continxencia supera as capacidades internas. Apuntou que unha das liñas do Plan Nacional é a formación específica tanto para o persoal cultural como para o externo, para facilitar criterios e metodoloxía de intervención en patrimonio cultural, un labor que ten sido interrompida pola pandemia.

    O X Encontro de Conservación e Restauración foi inaugurado na mañá de onte pola directora da Escola de Restauración Carme Lorenzo e o director do Museo de Pontevedra Xosé Manuel Rey. Este salientou o éxito das xornadas, que contan coa asistencia presencial de 120 persoas e en liña doutras 90 que participan dende países tan dispares como Italia, Bélxica, Estados Unidos, Brasil, Bolivia ou Exipto.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.