12 C
Pontevedra
Venres, 29 de Marzo de 2024
Máis
    HomeÉ NoticiaO Museo celebrará o Día da Arquitectura 2021 cunha grande montaxe fotográfica

    O Museo celebrará o Día da Arquitectura 2021 cunha grande montaxe fotográfica

    Pídese a colaboración de cativada de entre 5 e 12 anos para tomar e enviar imaxes dos lugares que máis lles gustan dentro da súa casa

    Imaxe de arquivo de visitantes no Museo de Pontevedra / Rafa Estévez ©

    O Museo de Pontevedra vai celebrar o Día Mundial da Arquitectura 2021 que se conmemora o primeiro luns de outubro cunha actividade na que pretende implicar a cativada da provincia: unha grande montaxe mural de fotografías de fogares que fagan reflexionar sobre a importancia do deseño das casas na calidade de vida da veciñanza.

    Segundo lembra a equipa do Museo, o Día Mundial da Arquitectura é unha celebración que pretende achegar a arquitectura en todas as súas dimensións á cidadanía para facer una chamada de atención sobre unha disciplina que se percibe afastada da sociedade, polo que se desenvolven en todo o mundo distintas actividades conmemorativas en entidades culturais de todo tipo.

    O Museo de Pontevedra impulsa por este día unha actividade participativa para a cativada da provincia centrada na reflexión sobre o espazo doméstico, xa que as circunstancias vividas desde o 2020 levaron a moitas persoas a repensar os seus fogares e a caer na conta da importancia do espazo na calidade de vida da cidadanía.

    A través da mirada da cativada, e xunto a materiais e textos aportados polos equipos de deseño, construirase un gran ‘collage’ sobre o concepto de casa e fogar. Para iso, cada pequeno e pequena participante debe facer unha fotografía con dispositivo móbil ao espazo da súa casa onde máis lle guste estar e enviala ao correo contacto@tallerabierto.info. A imaxe deberá ir acompañada dun pequeno texto que explique as razóns da elección.

    Poderá participar na iniciativa rapazada de 5 a 12 anos, sempre coa autorización das persoas responsables, e remitir os envíos antes do 1 de outubro. A exposición que se creará coa mestura das imaxes poderase visitar no primeiro andar do Edificio Castelao do Museo entre o 5 e o 12 de outubro.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.