A presidenta da Deputación de Pontevedra, Carmela Silva, xunto á profesora universitaria, María Álvarez Lires, deu a coñecer hoxe a novidosa iniciativa ‘O mar das mulleres’ froito da colaboración entre a institución provincial e a Universidade de Vigo e no marco do proxecto ‘Mar en Feminino’, que lidera a Facultade de Ciencias da Educación do Campus de Pontevedra. Silva destacou que se trata dun paso máis, o terceiro, trala creación da web marenfeminino.campusdomar.gal e a posta en marcha da exposición itinerante ‘Achegas das mulleres á sustentabilidade do mar’.
‘O mar das mulleres’, segundo Silva, “naceu das anteriores iniciativas xa que foi unha demanda dos propios centros educativos que con motivo da mostra ‘Achegas das mulleres á sustentabilidade do mar’ nos formularon a necesidade de contar con contidos educativos para traballar nas aulas”. En liñas xerais, tal e como explicou a presidenta provincial, o ‘Mar das mulleres’ fai fincapé no papel das mulleres na conservación dos océanos e uso sustentable dos recursos mariños. Así, da man dunha rapaza chamada Emma, “moi curiosa e comprometida”, vanse dar a coñecer diferentes elementos relacionados co mundo mariño como ‘Os océanos’, ‘Océanos en perigo’, ‘Redeiras, salga e conserva’, ‘O marisqueo a pé’, ‘Investigadoras mariñas’, e ‘Educación para a sustentabilidade’.
Na web marenfeminino.campusdomar.gal estarán dispoñibles os seis recursos educativos abertos protagonizados por Emma con información temática e propostas de actividades. Así, a través de ‘Océanos’ Emma explica a cor azulada da terra dende o espazo, afonda na súa importancia para a estabilidade climática e no liderado das mulleres en proxectos de conservación dos océanos; ‘Océanos en perigo’ fai fincapé nas principais ameazas que existen para os océanos; ‘Redeiras, salga e conserva’ repasa os oficios femininos centenarios relacionados co mar; en ‘O marisqueo a pé’ Emma visita o mercado e coñece o traballo de marisqueo; en canto a ‘Investigadoras mariñas’ preséntanse a mulleres como Silvia Earle, Ángeles Alvariño, Aida Fernández Ríos, Elisabeth Mann e Josefina Castellví, repasando os principais fitos que alcanzaron; e ‘Educación para a sustentabilidade’ afonda nas achegas das mulleres á sustentabilidade.
Os seis recursos educativos abertos, amais de información e documentación sobre os eixos temáticos que abranguen, inclúen propostas de actividade para realizar nos centros educativos como o emprego de ferramentas como Google Maps ou MedclickKids; a procura de información e investigación sobre oficios femininos relacionados co mar, sobre o cambio ambiental ou sobre mulleres oceanógrafas ou do campo mariño; tamén a realización de entrevistas, clips de vídeos ou blogs; recompilación de fotografáis; visitas a Museos; elaboración de paté de peixe e ata experimentos para determinar as variacións do pH.
V Xornada ‘Bo Uso e Mal Uso do Mar’
Estas infografías e recursos educativos abertos que compoñen ‘O mar das mulleres’ van ser protagonistas da ‘V Xornada sobre bo uso e mal uso do mar’, que terá lugar o vindeiro xoves, 11 de abril, na Facultade de Ciencias da Educación e do Deporte do Campus de Pontevedra e coa que está a colaborar a Deputación de Pontevedra.
As xornadas ‘Bo uso e mal uso do mar’ teñen como obxectivo principal a comprensión, uso sustentable e protección do medio mariño e para elo, ano tras ano, achéganse aportacións e propóñense materiais didácticos axeitados para levar a cabo intervencións nas aulas, como é o caso de ‘O mar das mulleres’. Amais, tamén se aproveita a ocasión para promover o papel das mulleres no mar, recoñecendo a súa contribución á xestión sustentable do mar desde todos os ámbitos. Neste caso, tal e como avanzou María Álvarez Lires, este ano participará a oceanógrafa do Instituto Español de Oceanografía Ana Morillas que falará do proxecto ‘Oceánicas’, onde se visibiliza ás mulleres que investigaron e están a investigar sobre os océanos.
