17.6 C
Pontevedra
Luns, 15 de Abril de 2024
Máis
    HomeÉ NoticiaO Goberno provincial cualifica de "estrepitoso fracaso" o plan galego de banda...

    O Goberno provincial cualifica de “estrepitoso fracaso” o plan galego de banda ancha que prevía o 96 % de cobertura de fibra óptica no 2020

    Carlos Font: “O avance dixital é unha competencia autonómica máis entre as moitas que a Xunta non exerce. O Goberno do Estado investiu 13 millóns € o pasado marzo que levaron a rede de alta velocidade a 5.552 fogares da provincia. Iso son feitos”

    A rede de fibra óptica avanza no rural da provincia de Pontevedra ao ritmo que marcan as subvencións do Ministerio de Asuntos Económicos e Transformación Dixital co Plan Estatal de Banda Ancha Galicia (PEBANGA). A última convocatoria repartiu o pasado mes de marzo 13 millóns de euros que permitiron levar o servizo a 5.552 fogares pontevedreses. Mentres tanto, as axudas da Xunta canalizadas a través da Axencia para a Modernización Dixital (AMTEGA), resultan escasas e opacas, pois a Xunta non ofrece datos dos seus resultados. Así o revelou, o voceiro do grupo provincial socialista, Carlos Font, durante o Pleno da Deputación.

    A raíz da moción presentada polo PP que foi rexeitada, Font subliñou que o avance dixital é “unha competencia autonómica máis entre as moitas que a Xunta non exerce e que agocha trala súa obsesión por confrontar co Executivo central”. “Que fai a Xunta? Queda sentada agardando a que nos resolvan todo dende Madrid?”, preguntouse. Ademais, lembrou que as subvencións para despregamento de fibra óptica en Galicia teñen apoio dun 75% dos fondos europeos FEADER, “o que tamén vén a demostrar o que xa sabía todo o mundo: que a Xunta é incapaz de transformar eses fondos europeos en Km de fibra óptica e que o único avance real é o que chega coas axudas estatais”.

    Font acusou ao PP de “chegar sempre tarde” xa que o 2 de xuño o secretario de Estado de Telecomunicacións e Infraestruturas Dixitais visitou Galicia e anunciou un novo esforzo de despregamento dixital, con redes de alta capacidade ata o ano 2025, incluíndo a aceleración do 5G. Un plan da Estratexia para o Reto Demográfico que vai significar a mobilización de 2.000 millóns de euros con 13 proxectos piloto, nove deles na provincia de Pontevedra.

    O deputado explicou que no ano 2015, a Xunta aprobou o Plan de Banda Larga 2020, que fixaba como obxectivos irrenunciables que o 100% dos fogares situados en núcleos rurais de máis de 500 habitantes tivese cobertura de alta velocidade e que un 96% da poboación de Galicia contase co servizo, ademais do 100% das empresas situadas en polígonos industriais. “Cumpriu a Xunta eses obxectivos?”, preguntouse, “ou formaban parte dos Mundos de Yupi?” “A Xunta quedou ancorada no ADSL”, concluíu. Tras instar ao grupo do PP “a entonar o mea culpa” cualificou a moción para esixir investimentos unicamente ao Estado e exculpando á Xunta, sendo a Administración competente, como “a certificación dun estrepitoso fracaso”.

    80 millóns investidos polo Estado e tan só 14 pola Xunta

    Font engadiu que os investimentos do plan estatal para Galicia, PEBANGA, nos tres últimos anos ascenderon a 80 millóns de euros. Na provincia de Pontevedra catro operadores resultaron beneficiarios (R, Opegal, Áurea Energía e Telefónica) , posibilitando a chegada da fibra óptica a 41 dos 62 concellos da provincia (Agolada, Arbo, Bueu, Caldas de Reis, Cambados, Campo Lameiro, A Cañiza, Catoira, Cerdedo-Cotobade, A Estrada, Cuntis, Covelo, Crecente, Forcarei, Gondomar, O Grove, A Guarda, Lalín, Marín, Mondariz, Mos, As Neves, Nigrán, Oia, Pazos de Borbén, Poio, Ponteareas, Pontecesures, Pontevedra, Redondela, Ribadumia, Rodeiro, Salceda de Caselas, Salvaterra de Miño, Sanxenxo, Silleda, Tui, Vigo, Vila de Cruces, Vilagarcía e Vilanova de Arousa). Esta mesma semana anunciábase a posta en servizo da banda ancha no Concello de A Estrada, unicamente con axudas estatais. “Cales son os datos da AMTEGA da Xunta de Galicia?”, preguntou Carlos Font, e invitou a comparar a transparencia sobre as subvencións nos sitios web do Ministerio e de AMTEGA.

    Font engadiu que “contra os 80 millóns estatais repartidos a catro operadoras nos últimos tres anos, a AMTEGA só repartiu 14 millóns en 2018 e ata o último céntimo foi para Telefónica, co triste resultado de que as zonas brancas (sen cobertura e sen subvención) pasaron a grises (con subvención concedida) e cunha sensación xeral de que gran parte das obras non se fixeron e, ademais, se desincentivou a competencia empresarial; unha xestión moi gris”. A AMTEGA anunciou outros 4 millóns para este ano 2021, pero, ademais da insuficiencia da cantidade, os antecedentes non invitan ao optimismo, concluíu.

    Pola súa banda, o vicepresidente da Deputación e voceiro do BNG, César Mosquera, ironizou dicindo que “o PP está encantado co Goberno provincial e se non aplaude é porque non lle deixan”. Argumentou que presentaron neste Pleno mocións sobre o despregamento dixital (“embrollando coas competencias”) e os indultos “porque recoñecen que se están facendo as cousas francamente ben na Deputación. Gracias!”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.