16.5 C
Pontevedra
Xoves, 20 de Xuño de 2024
Máis
    HomeÉ NoticiaO DOG publica a oferta pública de emprego de Sanidade para 2021...

    O DOG publica a oferta pública de emprego de Sanidade para 2021 cun total de 1.215 prazas

    Das 65 prazas ofertadas para o colectivo de persoal licenciado sanitario, 60 corresponden á categoría médico de familia

    O Diario Oficial de Galicia publica, na súa edición de hoxe, a oferta pública de emprego do persoal estatutario do Servizo Galego de Saúde para o presente ano, que inclúe un total de 1.203 prazas. Con esta oferta, a Comunidade Autónoma galega esgota a taxa máxima de reposición de efectivos autorizada pola lexislación básica do Estado, que é do 110 por cento.

    A nova oferta de prazas do departamento sanitario galego engádese ás aprobadas por este organismo de xeito continuo desde o ano 2012, o que supón, no total do período, de 8.112 prazas.

    O obxectivo é dar resposta ás necesidades asistenciais e organizativas identificadas como prioritarias polo Servizo Galego de Saúde, con especial atención aos ámbitos asistenciais cunha maior demanda de efectivos, e de necesario reforzo no actual contexto de crise sanitaria derivada da pandemia da covid, como a medicina de familia e, principalmente, enfermaría e as súas especialidades.

    648 prazas para enfermaría e as súas especialidades

    O total de prazas ofertadas para o colectivo de persoal licenciado sanitario é de 65, das cales 60 corresponden a médico de familia. Así mesmo, no que atinxe ao colectivo de persoal sanitario diplomado e de formación profesional, o total de prazas que se oferta é de 686. Destas, 604 corresponden á categoría de enfermaría, unha cantidade que sumada ás 466 incluidas nos decretos de 2019 e 2020, permitirán desenvolver un proceso selectivo para a cobertura de 1.070 prazas desta categoría.

    Con esta oferta, continúase a impulsar a progresiva dotación de prazas e a incorporación de persoal fixo das especialidades de enfermaría, coa aprobación de 44 novas prazas das especialidades de saúde mental, familiar e comunitaria, pediátrica, e obstétrico-xinecolóxica.

    Cómpre remarcar, así mesmo, que se ofertan cinco prazas para a categoría de técnico superior en dietética, categoría recentemente creada polo Servizo Galego de Saúde.

    Ademais, reforzarase o emprego fixo nas categorías de persoal de xestión e servizos, cun total de 452 prazas, entre elas, 220 para celador, 155 para o grupo auxiliar da función administrativa, e 18 para traballadores sociais.

    Sinalar, así mesmo, que o sistema selectivo será o de concurso-oposición, e respectará os principios de libre concurrencia, igualdade, mérito e capacidade.

    Do total de prazas, reservaranse un total de 61 delas para o acceso a persoas con discapacidade xeral, e 25 con discapacidade intelectual, así como as correspondentes para a súa provisión polo sistema de promoción interna.

    Nos mesmos termos que no decreto de oferta do ano anterior, inclúese a previsión expresa de que os baremos de méritos dos procesos selectivos das categorías/especialidades de medicina deberán incluír unha puntuación específica que valore a prestación de servizos en hospitais comarcais ou centros de saúde illados.

    Esta oferta pública de emprego súmase a outras medidas adoptadas pola Consellería de Sanidade para dar estabilidade aos profesionais como son, o Plan de estabilidade do emprego e provisión de prazas de persoal estatutario do Sergas, aprobado en Mesa Sectorial en marzo de 2017, e o nomeamento de continuidade para médicos de familia e pediatras de atención primaria, aprobado en Mesa Sectorial en xaneiro de 2019.

    Oferta para persoal sanitario funcionario

    No mesmo Diario Oficial, tamén se publica a oferta de emprego público para o presente ano correspondente a diversas clases de persoal funcionario da escala de saúde pública e administración sanitaria, que supón un total de 12 prazas que, sumadas ás ofertadas nos anos 2018, 2019 e 2020, permitirán a incorporación de preto de 100 profesionais no ámbito da inspección sanitaria e a saúde pública. Esta oferta esgota a taxa máxima de reposición de efectivos autorizada polo Estado.

    A oferta, que reforzará áreas prioritarias como a inspección sanitaria e a saúde pública, concrétase nas clases de inspector médico (3 prazas); farmacéutico inspector de saúde pública (6 prazas); e subinspector sanitario (3 prazas).

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.