As rehabilitacións dos edificios centrais e do convento de Santa Clara estarán listas en 2027, xusto a tempo para a celebración do centenario do Museo de Pontevedra. Así o confirmou o vicepresidente César Mosquera, quen deu conta dos avances das reformas de ambas construcións, que ao seu entender suporán unha “revolución absoluta” e un “cambio radical” na institución.
Mosquera subliñou que o Museo conta xa coa subvención de tres millóns de euros do PIREP para a rehabilitación dos edificios históricos, o que supón unha facilidade para impulsar a posta en marcha das obras, pero tamén esixe o cumprimento de prazo pechados: a mellora deberá estar lista a finais de 2026. “Non podemos demorarnos nos trámites porque non estamos moi sobrados”, dixo.
Por isto, e dado que Urbanismo da Xunta de Galicia vén de dar o informe favorable á modificación do Peprica que contempla a conexión soterrada, e porque hai conversas con Patrimonio que “despexan o horizonte” sobre os edificios, “danse as condicións” para aprobar xa o proxecto da rehabilitación.
Dada a elevada contía dos traballos, o visto bo do goberno provincial deberá realizarse por pleno, que se celebrará de forma extraordinaria o venres 19 de maio, xusto un día despois de que o Concello aprobe definitivamente a modificación puntual do Plan Especial de Protección e Reforma Interior e Conservación Artística do centro histórico de Pontevedra.
Unha vez salvados eses trámites, a Deputación pedirá a licencia e abrirase a licitación para a contratación das obras, que poderían iniciarse a finais de ano. “Este é un impulso definitivo á rehabilitación. O Museo merecía todos os esforzos”, destacou o nacionalista, quen subliñou que o orzamento da actuación roldará os 8 millóns de euros, unha cifra que considerou “xenerosa” e pola que agarda a presentación de importantes ofertas. “Xa no orzamento temos 15 millóns de euros consignados para facer fronte xa a todas as obras ademais dos fondos do PIREP”, destacou.
Unha das cuestións a destacar é que a rehabilitación terá un respecto máximo polas edificacións existentes na actualidade, mellorando o paso actual por unha conexión soterrada digna e folgada que permitirá aumentar unha superficie de 256 metros cadrados dando accesibilidade.
Como novidade, dixo o vicepresidente, estase a valorar a suxestión do departamento de Patrimonio de calar das fachadas tal como estaban os edificios orixinariamente (salvo a torre do Castro de Monteagudo, máis recente) . É algo “razoable”, dixo, posto que a pedra “é un elemento estrutural que sempre estivo enfoscado ou embelecido”, tal como acontece tamén noutras construcións, por exemplo, no santuario da Virxe da Peregrina.
Santa Clara, acceso despexado
Outra das novidades anunciada por César Mosquera no día de hoxe é que hai negociacións moi avanzadas co Arcebispado para conseguir un mellor acceso para o recinto de Santa Clara polo lateral do edificio das Obras Pontificias, toda vez que non é posible a compra do inmoble a pesares dos últimos intentos. Os estudos de arquitectura que están a realizar as súas propostas de deseño xa foron informados desta novidade para que a incorporen nos seus anteproxectos.
O prazo para que as cinco firmas preseleccionadas presenten os seus traballos finaliza o día 24 de maio, o día 29 constituirase o xurado, e os días 5, 6, e 7 de xuño reunirase este para facer a selección definitiva. A mediados de xuño saberase que equipo será o autor do proxecto final, tendo seis meses para desenvolvelo. “A mediados de 2024 poderían empezar as obras, que tamén durarían dous ou tres anos, polo que entre 2026 e 2027 estarían todos os edificios do Museo en funcionamento”, salientou o responsable provincial, data que coincidirá cunha celebración do centenario da institución “por todo o alto”.
