7.9 C
Pontevedra
Venres, 29 de Marzo de 2024
Máis
    HomeÉ NoticiaA Deputación destaca o talento emprendedor no peche da I Aceleradora SmartPeme

    A Deputación destaca o talento emprendedor no peche da I Aceleradora SmartPeme

    Orgullosa polo músculo e “talento emprendedor” da provincia, a presidenta da Deputación Carmela Silva, xunto á directora da Fundación Roberto Rivas, Olga Rivas, e a deputada de Novas Tecnoloxías, Ana Mejías, veñen de pechar na sede de Vigo a I Aceleradora multisectorial de empresas SmartPeme e de entregar os premios do II Concurso de Desenvolvemento de Solucións Innovadoras a Retos. AC8 Arquitectura (Vigo), con 900 €, e ProPlantae (Nigrán), con 600 €, recibiron o primeiro e segundo premio respectivamente ás mellores iniciativas da aceleradora e Rurale (A Guarda) e AirCO2 (Pontevedra)  acadaron cadanseu galardón de 2.000 € no marco do concurso de innovación.  Todas as iniciativas, destacou a presidenta, teñen unha mirada “moi social, innovadora e comprometida, que fala de xente que quere crear empresas diferentes con valores centrados na sostibildiade, no coidado, no humanismo, que constrúen sociedades e fan que o mundo sexa mellor”.

    “Somos unha provincia que avanza e avanza moito, e iso ten moito que ver coa nosa vinculación con grandes proxectos industriais e cunha universidade que fomenta moito o talento. Comezar o luns falando de innovación, emprendemento, talento, intelixencia, capacidade de crear riqueza e emprego, de intentar ser unha referencia nos novos retos aos que nos enfrontamos como sociedade é un chute de enerxía” asegurou Carmela Silva na xornada. A presidenta, amais de remarcar o compromiso do persoal implicado no programa SmartPeme, enxalzou o papel dos proxectos presentados tanto á aceleradora como ao concurso de solucións innovadoras: “Son todos únicos e moi importantes, vinculados ao medio ambiente, ao coidado do planeta, a dar vida ao rural, ao turismo sostible, aos coidados, a dar novas respostas a necesidades novas”. Tamén fixo fincapé na colaboración público-privada coa Fundación Roberto Rivas, entidade coa que a Deputación ten en marcha un convenio para impulsar estas iniciativas, que está a permitir “favorecer o desenvolvemento, impulsar o talento e a innovación en todo o territorio da provincia”. “Non hai posibilidades de avanzar –destacou- se non o facemos sumando sinerxías”.

    Precisamente neste mesmo eido incidiu Olga Rivas, directora da Fundación Roberto Rivas, quen ademais subliñou que “cada vez se están a presentar proxectos máis innovadores e atractivos, que xeran emprego e autoemprego e contribúen a transformar o sector e a contorna e a xerar riqueza”.

    A I Aceleradora multisectorial de empresas SmartPeme, que vén de pecharse coa entrega de premios ás mellores iniciativas aceleradas a AC8 Arquitectura e ProPlantae, desenvolveuse entre setembro e novembro coa participación de proxectos “recentemente nados”, que tiñan por obxectivo reorientar o seu negocio e poñer en marcha a súa actividade en liña. Para elo, durante este tempo, achegóuselle formación sobre o emprego das TIC, as redes sociais e a imaxe corporativa.

    O gañador da I Aceleradora multisectorial de empresas foi Alexandre Cameselle con AC8 Arquitectura (Vigo), estudo de arquitectura especializado nos cambios de uso de locais a vivenda, co obxectivo de paliar a escaseza existente e os altos prezos, rexenerando ademais o mercado inmobiliario ao reconverter locais comerciais devaluados e sen demanda, de maneira rápida e ecolóxica. O segundo premio recalou en Vanesa Redondo con ProPlantae (Nigrán), un laboratorio biotecnolóxico cuxa misión é diagnosticar fungos e estudar a multiplicación de microorganismos antagonistas para producir extractos de plantas coa finalidade de empregar como bioestimulantes, biocidas ou outros produtos que incrementen o rendemento dos cultivos.

    Xunto a AC8 Arquitectura e ProPlantae tamén participaron na aceleradora Rosa María Estévez con Marla Crianza (Ponteareas), proxecto baseado na dixitalización e venda en liña de produtos de puericultura e crianza respectuosa, que tamén imparte charlas e asesoramentos personalizados sobre lactación, porteo ou alimentación complementaria; María Soliño con Capptus (Vigo), startup turística que pretende facilitar a comunicación entre a axencia de viaxes, guía turística e persoas viaxeiras, para que sexa rápida, cómoda e en tempo real; e María Rivas Couceiro con Parque de Aromas Maruxío (Pontevedra) cun proxecto de agroturismo que oferta turismo de experiencias 360º a través de aloxamento e da  recuperación da cultura das plantas aromáticas, culinarias e medicinais.

    II Concurso de desenvolvemento de solucións innovadoras

    Tamén se puxo fin ao II Concurso de desenvolvemento de solucións innovadoras, que arrancou o 28 de outubro, coa entrega de premios a Rurale e AirCO2. Esta iniciativa, que se trata do cuarto reto tecnolóxico lanzado pola Deputación dende o 2019, tiña por obxectivo galardoar ás mellores iniciativas en impulsar solucións innovadoras a través da creación dunha aplicación móbil, web ou plataforma tecnolóxica que axudase a promover a sustentabilidade nas empresas e no medio rural, a contribuír na mellora da igualdade nas empresas e a impulsar o emprendemento.

    No II Concurso de desenvolvemento de solucións innovadoras déronse cita tres proxectos liderados por cinco mulleres e catro homes. Rurale (A Guarda) impulsado por Jarol Meléndez, Leticia Correa e Luis Eduardo Castro, ten como obxectivo sacar proveito a terreos en desuso a través dunha app para crear comunidade entre persoas propietarias dos terreos e persoas usuarias de xeito que as primeiras saquen rendemento e manteñan limpos as súas propiedades ao tempo que as usuarias dispoñen dun catálogo de terreos a bo prezo para o seu desfrute. AirCO2 (Pontevedra) liderado por Máximo Sánchez, Pío Iglesias e Estela Cardala pretende democratizar e facilitar a transición  ecolóxica axudando ás empresas a medir, reducir e compensar a pegada de carbono a través dunha aplicación que permite medir as emisións e compensalas asociándose con persoas propietarias de leiras en montes. MeetRural (Baiona) impulsado por Sandra Fontinha, Lucía Prado e Agustina Patiño trátase dunha plataforma con información tanto dos concellos rurais do sur de Galicia e norte de Portugal como dos negocios e profesionais que neles se sitúan, para fomentar o comercio de proximidade e o consumo local.

    De Rurale e AirCO2, os proxectos vencedores do II Concurso de desenvolvemento de solucións innovadoras o xurado valorou positivamente a innovación dos seus modelos de negocio, o impacto que xeran na provincia, a incorporación de elementos innovadores e tecnolóxicos, o feito de ser proxectos escalables dixitalmente e a inclusión de acción sostibles.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.