O Club Baloncesto Nigrán organizou a VIII edición do torneo basket Sen Barreiras no pavillón de Panxón cun dobre obxectivo: romper obstáculos sociais a través do deporte e recadar fondos para A ASOCIACIÓN FRANGIL contra a leucemia. Preto de 30 equipos de baloncesto e máis de 300 xogadores e xogadoras déronse cita durante dous días no Pavillón de Panxón en horario de mañá e tarde.
As xornadas de mañá serviron especialmente para visualizar e promover a integración social de persoas con algún tipo de discapacidade . Para iso contaron co centro Juan María que gozaron de diferentes actividades e unha marabillosa convivencia cos xogadores e xogadoras do CB Nigrán.
Para as xornadas de tarde habilitáronse 3 pistas onde xogaron os equipos dos diferentes clubs participantes nas categorías alevín, benjamín e babi. Estas dúas últimas o luns de tarde e a categoría alevín pechando o torneo o martes de tarde.
Á entrega de medallas asistiron o alcalde de Nigrán Juan González, a concelleira de igualdade Patricia Diego e Roberto Garrido , concelleiro de Cultura.
Cada xogador/a participante realizou un donativo para a Asociación FRANGIL que foi depositado na urna que se atopou no pavillón durante os dous días de torneo. Todas as familias de xogadores así como o resto de persoas asistentes ao torneo tamén colaboraron con este fin solidario achegando o seu donativo na devandita urna.
Todo o recadado durante os dous días de torneo así como durante a semana na que a urna visitou os diferentes colexios de Nigrán, será entregado á asociación FRANGIL contra a leucemia.
Desde a directiva do Club queren agradecer a axuda e colaboración da Fundación a Caixa, do Concello de Nigrán, da Federación Galega de Baloncesto, das direccións e claustros dos centros educativos de Nigrán, do resto de entidades colaboradoras así como de todos os clubs participantes, adestradores e familias, que fixeron posible o éxito deste BASKET SEN BARREIRAS.
