O Concello de Nigrán vén de artellar un amplo programa de actividades para o mes de maio que permitirá que, ata o Día das Letras Galegas, veciños e visitantes poidan gozar de actividades case que diarias. O programa iníciase o día 1 de maio cun xantar, concretamente unha paella, organizada pola Comisión de Festas de Vilariño. As 18 horas e dende o cemiterio de Camos, terá lugar a saída da andaina que permitirá percorrer o que será o futuro Parque Forestal Os Matos-Río Táboas.
O venres 3, o Auditorio Municipal será escenario do concerto de ‘A Banda da Loba’, mentres que o sábado 4 de maio, con saída ás 19 horas dende o campo de fútbol, comezará a andaina e visita ao Castro de Chandebrito. Ás 21 horas, no Bosque da Memoria de Chandebrito, concerto de Gi Appassionati.
O domingo, 5 de maio ás 10 horas, I Concurso de Doma Clásica en Porto do Molle. A xornada dominical rematará ás 20 horas, no Auditorio Municipal, co monólogo de Carlos Blanco. A entrada será de 5 euros a beneficio da protectora Baisenpulgas.
O programa de actividades do mes de maio de Nigrán, seguirá o martes 7 ás 12 horas, cun espectáculo musical interpretando cantigas do ‘Cancioneiro de Cotobade’ a cargo de Xoán Curiel e Charo Pita, actividade incluída dentro do programa do Día das Letras Galegas.
O sábado 11, ás 12 horas, xornada de xogos intersociais en Priegue.
O domingo 12 ás 12 horas e no Pazo de Cea, Concerto Solidario ‘Juan María, coa participación de Eladio y los seres queridos e a Orquestra Clásica de Vigo, actividade que estará presentada polo monologuista de Salceda de Caselas, David Amor, sempre disposto a contribuír ás causas solidarias. As 19 horas, celebración do Día da Nai en Bolos da Carrasca.
O martes 14 , xa achegándonos á data das Letras Galegas e incluída no seu programa de actividades, representación de teatro infantil con ‘O misterioso caso de Antón Fraguas’, a cargo de Polo Correo do Vento ás 17 horas na Praza do Concello.
O venres 17 de maio, Día das Letras Galegas, ás 10 horas terá lugar a saída da XXX Festa da Bicicleta dende o Pavillón Municipal de Panxón. Ás 20 horas, Concerto de Novos Aires e Cantares de Brión no Auditorio Municipal e, para rematar a xornada grande das Letras de Galicia, ás 20:30 horas Concerto de Batucada no Centro Cultural de Camos.
