A pesar de ter vixencia ata o 31 de Decembro de 2020, o pasado 1 de xullo a Xunta de Galicia desestimou o recurso potestativo interposto polo Concello de Baiona ante a resolución do Convenio de colaboración para a denominada Fase 2 de humanización de Sabarís, resolución adoptada unilateralmente pola Xunta alegando incumprimento das obrigacións por parte do Concello, cando a realidade é diametralmente oposta.
O proxecto que vén desenvolvéndose desde o ano 2016, sufriu diversas modificacións resultando que a súa última revisión (denominada Rev-4), non foi presentada pola Xunta ante o Concello para a súa oportuna tramitación municipal.
En diversas ocasiones a Xunta de Galicia requiriu ao Concello achegar a certificación de dispoñibilidade dos terreos para promover a licitación da obra, xestión inviable e irresoluble ao non contar o Concello nin coa última revisión do proxecto nin coas preceptivas autorizacións sectoriais.
O rexedor do Concello, Carlos Gómez sinala que “a Xunta de Galicia púxonos entre o eixo e a roda, no que parece unha deliberada acción política sen fundamento xurídico”. “Non pode pretender a Xunta que é a que incumpre –subliña Gómez–, resolver o convenio achacando ao Concello a existencia dun incumprimento. Non esquezamos que é a propia Xunta de Galicia a que promove a obra, polo que se realmente tivese vontade de levala a cabo, non buscaría escusas peregrinas para bloquear o proceso.”
Esgotadas as vías administrativas, o Goberno Local ha adoptado a decisión de recorrer perante o xulgado do Contencioso a resolución do convenio ante o que supón unha clara vulneración dos principios de confianza lexítima e lealdade institucional.
O alcalde de Baiona, Carlos Gómez, lamenta a postura do portavoz do partido popular local, Ángel Rodal, quen “novamente, demostra máis interese en defender posturas partidistas que as necesidades dos veciños de Baiona”. Finalmente, o rexedor local convida a quen estea interesado, a consultar o expediente no Concello.
