O Concello de Redondela recibirá, ao longo desta semana, un pedido de 50.000 máscaras homologadas cuxa compra xestionouse con distintos provedores durante estas dúas últimas semanas. Unha vez que o Concello redondelán teña estes elementos de protección, serán distribuídos entre a cidadanía buscando, dese xeito, o procedemento máis apropiado segundo as normas de prevención e salubridade.
Na mesma liña, o Goberno de Redondela solicitou á Vicepresidencia da Xunta de Galicia outro lote de 20.000 máscaras coa mesma finalidade.
Cómpre lembrar que, ao longo destas últimas semanas, o Concello xa puxo a disposición da poboación mais vulnerable, máis de 3.000 máscaras homologadas que son distribuídas polas farmacias do municipio e, do mesmo xeito, distribuíronse entre as e os traballadores/as e autónomos/as máis de 1.000 máscaras “co fin de que poidan desenvolver as súas actividades coas garantías sanitarias básicas”.
A alcaldesa Digna Rivas subliñou o feito de que, se o Concello dispón das máscaras ao longo desta semana “significa que vén traballando dende hai bastante tempo para conseguir este material, dadas as dificultades que teñen moitas empresas provedoras para contar con máscaras homologadas”.
En todo caso, Rivas lembra que, a día de hoxe “segue vixente o estado de alarma e as persoas que teñen que permanecer nos seus domicilios non precisan deste tipo de protección”. A adquisición destas 50.000 unidades de máscaras de protección, engade a alcaldesa de Redondela, “faise coa vista posta no momento en que se comecen a flexibilizar as medidas do estado de alarma e a veciñanza poida saír, de xeito controlado, ás rúas”.
O Equipo de Goberno, matiza Digna Rivas, centrou ata o de agora os seus esforzos “nas persoas que, por motivos laborais ou estado de vulnerabilidade precisan, agora mesmo e de xeito urxente, máscaras de protección homologadas”.