Unha persoa foi excarcerada na madrugada de hoxe despois de producirse unha colisión entre dous turismos na N-550, á altura do punto quilométrico 138, no concello de Redondela, en Pontevedra.
O sinistro tivo lugar ás 05:30 horas. Nese momento, o 112 Galicia recibía a chamada de varias persoas particulares que solicitaban a intervención dos equipos de emerxencia tras escoitar un choque entre dous vehículos na estrada que une Cesantes e Soutomaior. De acordo coa información facilitada ao 112, ao menos unha persoa parecía ter dificultades para abandonar o lugar polos seus propios medios.
Axiña, o persoal do Centro integrado de Atención ás Emerxencias de Galicia puxo a situación en coñecemento dos Bombeiros do Morrazo e de Vigo, dos axentes da Garda Civil de Tráfico, da Policía Local.
Tras chegar ao punto e comprobar que, efectivamente, unha persoa estaba atrapada, os equipos de intervención empregaron o material de excarceración para liberala. Así, a persoa puido ser trasladada polos servizos sanitarios ao centro hospitalario de referencia.
Desde o 112 tamén pasouse aviso aos membros de Protección Civil da localidade e ao servizo de mantemento da estrada.