O Concello de Redondela vén de anunciar a concesión de axudas directas á hostalaría. A iniciativa tenta paliar a complicada situación pola que está a pasar o sector debido ao último peche, dun mes de duración, decretado pola Xunta de Galicia para frear a expansión da COVID-19.
As axudas tal e como sinalou a concelleira de Comercio, María Castro, están dirixidas a establecementos de restauración, restaurantes, salóns de banquetes, cafetarías, bares, salas de festas, discotecas, pubs, salas de concertos e cafés-espectáculo cuxo local comercial afecto á actividade radique no termo municipal de Redondela.
O importe desta liña de axudas directas e de pagamento único, será de un máximo de 300 euros e serán compatibles cos establecementos que permanezan abertos para a recollida e reparto de comida a domicilio. Para a concesión das meemas, explicou a alcaldesa Digna Rivas, “o Goberno local optou pur un procedemento de tramitación máis áxil a fin de que poidan chegar canto antes aos seus destinatarios finais”.
Para mais información ao respecto, as interesadas e interesados poden consultar o Boletín Oficial da Provincia de Pontevedra do 1 de decembro, ou poñerse en contacto do Departamento de Desenvolvemento Local no teléfono 986 402 664.
A medida posta en marcha agora, forma parte dun paquete de iniciativas que o Goberno local deu a coñecer aos representantes da hostalaría nunha reunión co sector na que participaron a alcaldesa Digna Rivas, o concelleiro de Turismo, Daniel Boullosa e a concelleira de Comercio, María Castro.
Nesa xuntanza dábanse a coñecer medidas xa efectivas, como a derogación de taxas sobre as terrazas para todo o ano 2021 e a devolución do importe da taxa de recollida de lixo sobre o tempo que estiveron pechados e adiantábase a creación dunha liña de axudas directas para o conxunto do sector hostaleiro.
En todo caso, a alcaldesa Digna Rivas, sinalou que estas axudas permitirán “diminuír o impacto que o peche pola COVID tivo sobre este sector e, ao mesmo tempo, permitiralle tamén acortar o proceso de recuperación unha vez que se permita a reapertura dos establecementos”
