A “brutal” transformación que o goberno de Digna Rivas está a acometer en Redondela, “como hai moitos anos non se vía” está a ser financiada con recursos da Deputación de Pontevedra. A Deputación e o Concello teñen agora mesmo en marcha tres grandes obras, valoradas en 1,8 millóns de euros, para a remodelación da Avenida de Santa Mariña e da contorna da Picota e para a creación dun aparcadoiro disuasorio na zona de Vilavella. “Podo vir a Redondela a falar de feitos, do apoio concreto e real a un dos concellos máis importantes da provincia”, asegurou a presidenta Carmela Silva, quen aproveitou a visita para contrastar “obras que son amores” coa “palabrería” do Partido Popular, en alusión á visita que esta mañá protagonizaron á localidade a ex-ministra de Fomento Ana Pastor e o ex-alcalde, Javier Bas, aos que cualificou como “a raíña das promesas incumpridas” e “o noivo de Redondela á fuga”.
A transformación da avenida de Santa Mariña, cun orzamento de máis de 450.000 euros a través do Plan Concellos 2021, configurará dentro dun mes, unha vez que conclúan as obras, unha contorna máis amable, con servizos adaptados ao século XXI. O espazo contará con beirarrúas de pedra e pavimentación renovadas, novos sistemas de iluminación e sinalización, mobiliario urbano e redes de saneamento, abastecemento e liñas de comunicación. No barrio da Picota, a Deputación está a investir outros 849.000 euros a través do Plan ReacPon, que achega o 75% orzamento. Esta actuación, tamén moi esperada pola veciñanza da vila, comezou semanas atrás e suporá “unha transformación radical dunha contorna que ten un enorme valor patrimonial”, converténdoa nun lugar máis accesible e seguro, cunha mellora visual e funcional. Finalmente, están a piques de dar comezo as obras de construción do aparcadoiro disuasorio na zona de Vilavella, con outros 416.000 euros de recursos do Plan Concellos 2022 para completar a humanización da praza de Ponteareas e habilitar unha zona de esparexemento veciñal.
“A realidade é esta” asegurou a alcaldesa Digna Rivas. “Quen inviste en Redondela é a Deputación; absolutamente ninguén máis”. Rivas amosou a súa satisfacción por poder completar a transformación da avenida de Santa Mariña, “que urxía”, e a “grande transformación” na Picota, “unha das zonas máis esquecidas de Redondela, pola que pasa o Camiño de Santiago”. Finalmente, en relación ao aparcadoiro de Vilavella, reivindicou o derrubo da nave para completar o embelecemento desta entrada ao pobo.
“Obras son amores: feitos, realidades”
“Obras son amores, feitos, realidades… Eu podo vir aquí a falar de feitos, de apoio a esta vila tan importante, para poñer na balanza como actuamos unhas e uns e como actúan outras/os” asegurou a presidenta, que non dubidou en rexeitar a visita realizada esta mesma mañá pola ex-ministra de Fomento, Ana Pastor, e do ex-alcalde, Javier Bas. “Resulta curioso que Ana Pastor, a raíña das promesas incumpridas, e Javier Bas, o noivo á fuga de Redondela, se atrevan a vir a falar aquí para esixir ao Goberno do Estado investimentos que, por certo, están en marcha como os arranxos dos camiños de Chapela. É vergoñento e inexplicable. Xa está ben de que intenten tomarnos o pelo, de dar roldas de prensa sen ofrecer explicacións por non ter investido nada cando Rajoy gobernou durante oito anos. É un escándalo, un descaro”.
Carmela Silva referiuse resumidamente aos incumprimentos de Pastor en Redondela e en toda a provincia: “os proxectos quedaron esquecidos en caixóns, paralizados e ata algúns desapareceron”. Preguntouse tamén pola falta de execución dos anuncios do no de Bombeiros, en Pontevedra; a vía verde en Arcade ou o enlace da alta velocidade ferroviaria por Cerdedo ou a saída Sur de Vigo cara Portugal. Preguntouse tamén polos convenios electorais asinados pola Xunta co ex-alcalde, Javier Bas, como o da avenida Mendiño “que, agora mesmo, están a ser incumpridos”. “Xa está ben. Creo que nos toman por bobas e bobos”.
A alcaldesa de Redondela, Digna Rivas, destacou o distinto xeito de traballar dunha Deputación que asigna recursos, ano tras ano, e unha Xunta de Galicia que nin sequera cumpre o que asinou en 2019. “Queda un pouco raro que se mude por completo a avenida de Santa Mariña, que xa está en obras, ou o barrio da Picota e, sen embargo, a avenida de Mendiño, que era un compromiso da Xunta de Galicia co anterior alcalde, sega sen arranxarse”. A alcaldesa recalcou que o Concello de Redondela “fixo os deberes” do convenio da avenida de Mendiño, pero nin así. “Ogallá que a Xunta collera o exemplo da Deputación”, lamentou.