O Concello de Salvaterra de Miño vén de sumarse ás reivindicacións do colectivo LGTBIQ+ e aos actos conmemorativos do Día do Orgullo “co fin de dar visibilidade e loitar por unha sociedade máis xusta, igualitaria e diversa”. Este 28 de xuño celébrase en todo o mundo o Día do Orgullo LGTBIQ+ e o Concello de Salvaterra de Miño quere ser partícipe aportando o seu gran de area con algúns xestos que, aínda que queda camiño por percorrer, axudan a confiar nun futuro social máis xusto e tolerante.
Dentro das iniciativas para visibilizar ao colectivo LGTBIQ+, o balcón do Concello lucirá a bandeira e instalará un banco destinado a concienciar sobre a diversidade, o respecto e tolerancia cara este colectivo.
“Desexamos que este banco permita facer visible e sirva de apoio á causa, promovendo o respecto, a liberdade e a igualdade que persegue o colectivo LGTBIQ+ e que consideramos que debe ser un piar fundamental no desenvolvemento evolutivo dunha sociedade saneada, tolerante e adaptada aos novos tempos”, asegura a alcaldesa de Salvaterra de Miño, Marta Valcárcel.
O banco, pintado coas cores da bandeira LGTBIQ+ foi creado polo alumnado de Carpintería do IES SALVATERRA, implicando así á comunidade educativa dun xeito directo en iniciativas tan importantes coma esta.
Dende O Concello, afirma Marta Valcárcel, “queremos agradecer a todo o persoal docente, equipo directivo do centro e ao alumnado, o traballo conxunto que se leva a cabo día tras día e que se fan tan visibles en datas coma estas”.
Neste banco aparecen reflexados os nomes de todos e todas as participantes deste proxecto, que foron as alumnas e alumnos do 1º Ciclo de Carpintería.