Onte domingo e como xa é habitual dende hai doce anos, Defendendo o Tea respondía á chamada de Adega e a súa ‘Limpeza simultánea de ríos’. Non deixa de sorprender que, en pleno século XXI, Defendendo o Tea siga a sacar do leito do río neumáticos, plásticos, latas, toalliñas, ferros e ata a defensa dun coche. Chegará o día en que esta xornada solidaria co noso medioambiente pero, de momento, a labor de Defendendo o Tea é imprescindible.
Como todo, da xornada de onte sácanse lecturas positivas e negativas, varias de cada, para ser máis precisos. Positivo, que 22 persoas quítenlle tempo ao seu lecer para realizar unha acción que beneficia a toda a sociedade e que, desas 22 persoas, 6 sexan nenos e nenas, o que garante a continuidade da actividade e a esperanza dunha futura xeración máis concienciada na necesidade de coidar o planeta.
Negativo, que logo de tantos anos, só 22 persoas estean dispostas a facelo e que, a estas alturas de campionato, aínda haxa os descerebrados e descerebradas que confunden o río, ese marabilloso lugar de espallamento da cidadanía, cun estercoleiro.
Non é normal que os voluntarios e voluntarias, entre as que estaban tamén as concelleiras Nahir Covelo e Rosi Covelo, que decidiron mollarse polo río, recollan preto de 300 quilos de lixo.
A pregunta é, se en lugar de 22 persoas voluntarias foran 50 ou 100, cantos quilos recolleríanse?
Dende Defendendo o Tea agradeceu aos voluntarios e voluntarias “que se mollaran polo Tea” e especialmente aos nenos e nenas que “con moitísima ilusión colaboran todos os anos”. Do mesmo xeito agradecían as súas concelleiras a súa presenza no traballo común de preservar un río Tea “incluído na rede Natura 2000 que temos que cuidalo entre todos e todas, porque nas súas veiras e nas súas aguas viven moita flora e fauna merecedora de ser cuidada”, conclúe Defendendo o Tea.
