O Concello de Ponteareas pon en marcha a actividade ‘As plantas aromáticas no ritual de San Xoán’, unha xornada na que todas as persoas interesadas “aprenderán a recoñecer as plantas empregadas nesta noite tan sinalada. Os e as participantes sairán ademais a recollelas acompañadas dunha persoa experta, co que terán xa todo listo para continuar coa tradición e deixar plantas e flores en auga baixo a rosada da noite”, sinala o concelleiro de Cultura, Fernando Groba.
A actividade desenvolverase na capela de Santa Lucía, en Ganade-Areas, o vindeiro xoves 23 de xuño a partir das 19.00 horas. As persoas participantes poderán desfrutar nunha primeira parte dunha charla lúdica e didáctica para, ao rematar, facer un percorrido polos montes de Ganade para recoñecer e recoller estas herbas e plantas ventureiras.
O encontro será de balde e contará con prazas limitadas, polo que é imprescindíbel inscribirse previamente a través do correo electrónico auditoriomunicipal@ponteareas.gal.
