Ponteareas toma a palabra para conmemorar a figura de Rosalía de Castro no aniversario do seu nacemento o vindeiro 23 de febreiro. Xunto ás tres xornadas de música e teatro ao abeiro do festival Convergencias Galicia-Portugal co que homenaxear á escritora galega e a José Afonso, coincidindo co Día de Rosalía o Concello organiza tamén unha xornada repleta de actividades nas que os contos ou a poesía serán os grandes protagonistas. “Preparamos este día con moita ilusión para poder poñer en valor non só a Rosalía de Castro, unha figura indispensábel na literatura do século XIX, senón tamén a nosa lingua, ao tempo que contribuímos a dinamizar cultural e economicamente a vila”, destaca o concelleiro de Lingua, Fernando Groba.
Neste camiño, o Concello entregará aos comercios ponteareás bolsas coa imaxe e a obra de Rosalía para entregar a compradores e compradoras. Estas bolsas levarán impresas o poema ‘Nosa Señora da Barca’, recollido no libro ‘Cantares Galegos’ e no que aparece un verso no que se inclúe unha mención ás mulleres de Ponteareas. As bolsas repartiranse o 23 de febreiro.
Para achegar aos máis pequenos e pequenas á figura de Rosalía de Castro, o propio 23 de febreiro Tarabelos chegará á biblioteca municipal con ‘Contos nunha roda’, historias relatadas coa técnica de Kamishibai, unha forma de contar contos milenaria procedente do Xapón a través dun pequeno teatro de papel montado nun monociclo. Será a partir das 17.30 horas con entrada libre ata completar aforo.
Ademais, despois do espectáculo ‘Cantares na Raia’ e do concerto do Orfeão de Merelim e Ars Cantorum de Guillade, o festival Convergencias baixará o pano en Ponteareas o venres 24 de febrero (20.00 h) coa obra de teatro ‘Mulheres’, de TIN.BRA, Academia de Teatro. Chega á sala multiúsos do auditorio municipal este retrato de tres historias de vida dramáticamente reais protagonizadas por tres mulleres con idades distintas, percorridos diferentes e lugares dispares que contan a súa vida de dor e sufrimento. Historias reais que gañaron forma de texto teatral para ofrecer una peza para ser vista, sentida e reflectida coa expectativa de que o teatro axude a mudar o mundo.
