12.5 C
Pontevedra
Domingo, 5 de Febreiro de 2023
Máis
    HomeO CondadoPonteareasPonteareas prepara un Corpus 2022 accesible para as persoas con discapacidade visual

    Ponteareas prepara un Corpus 2022 accesible para as persoas con discapacidade visual

    Ponteareas quere achegar a arte efémera do seu Corpus Christi 2022 a todas as persoas, eliminando calquera barreira e convertendo esta Festa de Interese Turístico Internacional nun encontro o máis accesible posible. Neste camiño, o Corpus dá a benvida a usuarios e usuarias do Grupo Social ONCE, que por primeira vez na historia do Corpus crearán a súa propia peza na Praza Maior grazas a unha plantilla especial adaptada para que poidan elaborar unha alfombra representativa da entidade. Pero ademais, o Concello pon en marcha xunto coa Asociación de Alfombristas do Corpus Christi de Ponteareas a ‘Beirarrúa aromática’, unha iniciativa na que os recendos das alfombras serán os protagonistas e servirán para que as persoas con discapacidade visual poidan orientarse e localizar cada un dos tramos a través do olfacto.

    “Queremos ser unha cidade amable para todos e todas con maiúsculas e iniciativas como as que poremos en marcha este Corpus permítennos camiñar cara a unha accesibilidade completa. Moitas grazas á ONCE e á Asociación de Alfombristas por ensinarnos que a explosión de cor coa que cada ano gozamos no Corpus pode chegar doutros xeitos ás persoas con discapacidade visual”, explicou a alcaldesa, Cristina Fernández Davila, durante o acto de presentación da iniciativa, que contou tamén coa presenza da directora da ONCE en Pontevedra, Marián Lorenzo, e co presidente da asociación de alfombristas ponteareá, Miguel A. García Correa.

    Xogando cos distintos olores que caracterizan as alfombras ponteareás, esta iniciativa permitirá identificar a través do olfacto cada unha das rúas e prazas por onde pasa a xente para ver as alfombras. Eses aromas conseguiranse empregando diferentes materiais para a confección de alfombras, que estarán identificados tamén con lazos de grandes dimensións e diferentes cores para que sexa visible a persoas con diferentes graos de discapacidade visual. “Levamos anos traballando para conseguir unha maior integración en algo tan importante para nós como é o Corpus e con esta iniciativa cada persoa poderá percorrer as nosas rúas de forma autónoma, orientarse e saber en que rúa está a través dos olores”, salientou o presidente dos alfombristas, que sinalou que se trata dun proxecto “ilusionante, sinxelo pero ambicioso”.

    Deste xeito, as persoas que gocen este ano do Corpus Christi de Ponteareas poderán identificar a Praza de Bugallal co recendo a pino, a rúa Oriente co olor a rosas, a Praza Maior co de árnica, o da rúa Ferreiros co do fiuncho, a rúa Fernández Vega co de romero ou xazmín, a Reveriano Soutullo coa lavanda ou a Avenida da Constitución co eucalipto.

    Pola súa banda, Marián Lorenzo, quixo agradecer a Concello e Asociación de Alfombristas o interese e o esforzo por incluír iniciativas como estas na súa festa grande, que “fomentan unha inclusión sociocultural fundamental para nós”. “Ao pasear polas alfombras desfeitas o recendo a todos os materiais empregados percibímolo con tanta intensidade como esa explosión de cor. É unha sensación moi agradábel e inesquecíbel”, recalcou a directora da ONCE en Pontevedra.

    A festa do Corpus sempre se caracterizou por aromatizar as rúas que acollen as alfombras, unha fragrancia única que foi elixida xa en 2019 polo Museo dos Aromas de Santa Cruz de la Salceda, en Burgos, para formar parte do seu catálogo de aromas e integrando o patrimonio dun museo único en España e en Europa.

    COLABORACIÓNS

    Antía Otero, «Barroco»

    É posible que todo viñese suxerido polo título do novo poemario de Antía Otero, «Barroco», pero ao mergullarme nas súas páxinas vivín a sensación de pasear por unha galería de arte na que cada un dos poemas era, en realidade, un cadro ou unha peza escultórica que a autora describía con detalle.

    Ponteareas e a filla pródiga: o novo espectáculo do Circo da Dereita

    Aínda que o pareza, non é un déjà vu, non. É real como a vida mesma. A dereita en Ponteareas regresa ao seu pasado, non sabemos se por convicción nostálxica ou, como parece máis evidente, por non atopar nada mellor que ofrecer. Se cadra, en realidade non hai tal regreso a un pasado que esa dereita nunca abandonou, por máis que durante os últimos anos algúns quixeran convencer a Ponteareas, pleno tras pleno e eleccións tras eleccións, de que aquel negro pasado nada tiña que ver con eles nin cun Partido Popular que, reescribindo a nosa historia política, tería nacido en 1998 coa chegada a Ponteareas dun Salvador chamado para redimir, como novo candidato popular, os imperdonabeis pecados orixinais da dereita ponteareán encarnada até ese momento por un alcalde orgulloso do seu pasado franquista.

    María Solar, «A culpa»

    A metade de camiño entre a novela negra e o thriller, María Solar vén de presentar un novo traballo para adultos no que pescuda nas interioridades da parte máis escura da alma humana a través dun trío de mulleres, protagonistas do relato.

    Antón Riveiro Coello, «Días de intemperie»

    A nova achega de Antón Riveiro Coello, «Días de imtemperie», é unha proposta que contén nove relatos de temática e transfondo diferentes, mais que teñen un elemento en común, como é a guerra no sentido máis amplo da palabra.

    Colaboradores

    Alberto Aliaga Sola
    20 POSTS0 COMMENTS
    Bea Sanfa
    14 POSTS0 COMMENTS
    Manrique Fernández
    78 POSTS0 COMMENTS
    Paz de la Peña
    41 POSTS0 COMMENTS
    Ricardo Canosa Bastos
    14 POSTS0 COMMENTS
    Roberto Mera
    6 POSTS0 COMMENTS
    Avatar
    1 POSTS0 COMMENTS