Hai un tempo que se está a xerar certo debate na vila do Tea, sobre o novo plan de mobilidade. Os debates entorno as medidas que supoñen retirar tráfico en favor das persoas, son repetitivos. Non é Ponteareas o único caso nin ha ser o último.
O certo é que as medidas que se están a poñer en marcha, non son ningunha novidade. Tal é así que este tipo de iniciativas teñen a súa orixe nos EEUU, hai xa cen anos e chegaron a Europa un pouco máis tarde. Mesmo en Galicia hai xa varías décadas, que se teñen activado en distintas localidades e en todos os lugares os resultados son claramente positivos. E non fai falta ir moi lonxe de Ponteareas. Calquera pode ir a vila de O Porriño e preguntar si os comerciantes afectados queren a volta atrás. Mesmo en Ponteareas podemos preguntarnos se as veciñas e veciños queren de novo os autobuses entrando ata a Praza Maior ou si se quere de novo o trafico os sábados no mercado.
Polo que se coñece publicamente o plan de mobilidade, non é unha ocorrencia. Está feito con datos rigorosos e por profesionais técnicos. Os veciños e veciñas podemos ter cada quen a súa opinión. Pero sería de agradecer por respecto os profesionais que fixeron o traballo, que cando a opinión é contraria se faga dando datos que avalen esa postura. Porque dicir que é a ruína é fácil. Pero o certo é que outro goberno anterior, xa peonalizou outras rúas e non se escoitou ese grito de alarma. Cal é a diferenza?, se temos en conta que a diferenza de aquela hoxe Ponteareas dispón de bastantes máis prazas de aparcadoiros que de aquela. Ou é que non se perderon prazas de aparcamento naquela ocasión?.
Tampouco resulta serio, por parte dos grupos da oposición, que se diga que se está de acordo coas peonalizacións, pero non así. Sen poñer enriba da mesa unha alternativa,amparada por criterios técnicos. A verdade é que se a alternativa pasa por posicións tan vagas, mal vamos. A política debe ser cousa seria e é moi feo mentir. Digo isto porque aínda estou a buscar as catro chemineas da caldeira de biomasa e tamén a central térmica. Claro que nese caso non só foi quen exerce a oposición senón tamén aquelas “persoas”, que levan toda a vida concibindo o Concello como negocio particular , e sen entender o concepto de democracia, diría que cunha total carencia de decencia. Pero xa non enganan a ninguén.
A oposición ten que ser mais valente e non facer como o alcalde de Madrid que criticou a peonalización da anterior mandataria e agora él vai incrementala. Porque a U.E. non lle deixa facer o contrario.
Hoxe a experiencia e os datos, acreditan que o sector comercial gaña nas zonas que se saca o tráfico a favor de espazos libres de coches, pero as razóns son se cabe de máis calado. A organización mundial da saúde vén advertindo que cada ano morren de xeito prematuro en Europa 400.000 persoas, produto da contaminación e da vida sedentaria . A Unión Europea está a impulsar medidas como as que se están a implantar en Ponteareas, mesmo ten advertido o Estado con sancións por non desenvolver medidas tendentes a eliminar tráfico das zonas urbanas.
O comercio ten problemas claro que sí, mais tamén é certo que nunca antes se fixeron tantas cousas dende o Concello tendentes a favorecer o comercio local e nesa senda debe seguir.
Pero a problemática do comercio local é global,tal e como indica a CEC ou a Universidade Complutense de Madrid , nun traballo de 2017. E dous son os factores que agudizan a situación , por unha banda a instalación de grandes áreas comerciais que xa parte da década dos oitenta e agora a explosión do comercio electrónico. No caso de Ponteareas a estes dous factores eu engadiríalle a desaparición de empresas (Granitos de Galicia, Aceros del Tea, AVIGAN, Gramol e outras), a falta de solo industrial, e disto hai que preguntarse como é posible estar vinte anos sen poder ter un PXOM. Volvo repetir que a política debe ser cousa seria, porque o contrario trae consecuencias que prexudican os cidadáns. A perda de poboación na comarca outro factor a considerar e o alto nivel de paro e en consecuencia o baixo poder adquisitivo.
Se Europa ten concedido axudas o Concello é para adoptar medidas como as que se están a executar.Será que os proxectos van en liña coas súas directrices, como acaban de facer co cambio a led de todo o alumeado das 24 parroquias.
O goberno municipal hai que pedirlle que persevere en que podamos ter unha vila máis saudable , ampliar a revitalización ás parroquias e deseñar o fortalecemento empresarial e económico.
