A Concellería de Culturado concello de Ponteareas, que dirixe Fernando Groba, vén de dar conta da publicación das bases polas que se rexerá o Concurso de Gaitas do País de Ponteareas 2019 que, con esta, acada xa a súa quincuaxésimo segunda edición. É, sen dúbida de ningún tipo, o referente en Galicia no que á música tradicional atinxe xa que, os grupos que participen, deberán estar compostos, exclusivamente, por dúas gaitas, un bombo e un tamboríl.
A inscrición estará aberta ata o día 6 de setembro e todos os grupos de gaitas que toquen con instrumentos tradicionais galegos poderán presentar as solicutudes no rexistro de entrada do concello de Ponteareas ata as 13 horas. As bases poden consultarse na seguinte ligazón da web do concello de Ponteareas.
A LII edición do Concurso de Gaitas do País promove e difunde a música tradicional galega sendo o referente máis antigo de maior recoñecemento de toda Galiza. O número máximo de participantes será de vinte e realizarán unha ruada polo centro urbano antes de comezar o concurso.
O xurado do LII Concurso de Gaitas do País estará composto, como xa é habitual neste certame e dada a importancia do mesmo, por recoñecidos gaiteiros e personalidades do mundo da gaita e da música tradicional de Galicia que acordarán catro premios dotados de 1.800,00 euros, o primeiro premio; 1.200 € o segundo; 900,00 euros ao grupo que quede en terceira posición e, finalmente, 600 euros ao cuarto clasificado.
Amais, o primeiro clasificado e, polo tanto, gañador deste LII Concurso de Gaitas do País, terá como premio unha gaita de Gaitas Gil e un tamboril de Sanin Percusión doado por Artesanía de Galicia.
O concelleiro de Cultura, Fernando Groba, logo de lembrar que o festival terá lugar o vindeiro 21 de setembro, amosou o seu convencemento que “tras o éxito do ano pasado o público volva gozar dunha cita cos mellores sons da gaita tradicional”.