Coa incerteza que caracteriza esta tempada, as disciplinas deportivas buscan adaptar a súa actividade e calendario ás esixencias de saúde. Pero seguen adiante.
O CN Ponteareas organizou a primeira proba autonómica en piscina tras o “parón” que sobreveu ao estado de alarma: o Trofeo Amizade. A porta pechada, con limitación de participantes e protocolo especifico anticovid, mostraba que competir era posible.
Cos adestramentos de deportistas federados permitidos, as cifras de casos activos e a incidencia acumulada en Ponteareas provocaron o peche do complexo Deportivo Álvaro Piñeiro este último mes. Lonxe de tirar a toalla, mantendo a prudencia e as medidas de protección, apostamos por trasladar os adestramentos á piscina do Campus Universitario, investindo recursos, tempo e esforzos. O vindeiro luns 7 reabre a piscina do Álvaro Piñeiro, volvemos a casa.
Mentres, Lucas Costa participou no Campionato de España absoluto en novembro; a liga autonómica Máster celebrou a súa 1a xornada en Ourense o 29 de Novembro; Pablo Cabana participa esta fin de semana no trofeo internacional Castalia (en directo en Teledeporte) e o equipo feminino absoluto disputará a Copa de España de Clubs en Castellón do 18 ao 20 de decembro.
O Club quere agradecer aos nadadores e nadadoras e as súas familias “a colaboración e o compromiso nestas últimas semanas” e expresa o seu desexo de que “os datos epidemiolóxicos non volvan ser preocupantes, apelando á nosa responsabilidade como sociedade, seguro que poderemos contar, así o esperamos, máis logros dos nosos/ as nadadores/ as”.
