Esquerda Unida de Ponteareas ven de denunciar a situación na que se atopa o Servizo de Axuda no Fogar ao que, di a formación asemblearia, “o Concello de Ponteareas leva anos precarizando”. EU asegura que, actualmente, as traballadoras “non cobran os pluses de perigosidade e penosidade que veñen recollidos no convenio laboral vixente e están obrigadas a usar o seu coche persoal sen que se lle actualice a tarifa de quilometraxe (0,19€/quilómetro), reducindo así o seu poder adquisitivo”.
A maiores, EU afirma que, dende hai anos, as xubilacións “son cubertas por baixo da taxa de reposición autorizada” e acusa directamente ao goberno municipal “quen decidiu unicamente cubrir unha de cada dúas”. “O bipartito está moi cómodo privatizando este servizo e desententéndose tamén da realidade das traballadoras da empresa concesionaria, que levan un tempo denunciando a súa precariedade”, afirma a Coordinadora de EU.
Lembra Esquerda unida que o servizo de axuda no fogar (SAF) “ten por obxecto prestar un conxunto de atencións ás persoas no seu domicilio, desde unha perspectiva integral e normalizadora, naquelas situacións en que teña limitada a súa autonomía persoal e nos casos de desestruturación familiar”. Así, entre os obxectivos do SAF está mellorar a calidade de vida das persoas usuarias, posibilitar a súa permanencia no contorna de convivencia habitual e previr situacións de dependencia ou exclusión social, debendo ser un servizo esencial para a calidade de vida da cidadanía.
Para EU os recortes no SAF son evidentes xa que, o cadro de persoal do Concello conta, nestes momentos, con catro traballadoras “cando deberían ser, polo menos, once para garantir un servizo acorde ás demandas da veciñanza. Na propia RPT aparecen sete prazas, polo que tres están sen cubrir”.
A formación de esquerdas reclama “ampliar o persoal para este servizo, rematar coa súa privatización recuperando e ampliando todas as competencias do SAF por parte do executivo local, mellorar as condicións laborais e abrir unha ronda de escoita activa coas traballadoras e persoas usuarias co gallo de garantir un servizo de calidade”.
“A política é cuestión de prioridades”, afirma EU. “Está moi ben investir recursos municipais en mellorar o entorno do casco urbano, pero, a diferencia do que está a facer o goberno municipal, a principal preocupación dos e das gobernantes debería ser garantir unhas condicións mínimas de vida digna para toda a veciñanza”.