Visibilizar a importancia da ciencia no noso día a día e conectar á cidadanía ponteareá coa ciencia é o obxectivo da Semana das Ciencias, así o resume a alcaldesa e concelleira de Ensino, Cristina Fernández Davila, que dende hai seis anos organiza e desenvolve esta exitosa programación.
Actividades específicas para alumnado de todas as idades, conferencias para o público en xeral, obradoiros, saídas didácticas, exposicións e seminarios para profesorado son algunhas das propostas que ofrece o programa do 2022.
Profesores e investigadores das tres universidades galegas achegaranse ata a sala multiúsos do auditorio municipal para compartir os seus coñecementos sobre sustentabilidade e cambio climático, temática elixida para a edición deste ano.
Pilar Piñeiro, Pedro Pablo Gallego, Juan Picos, Xana Álvarez e Enrique José Varela son algúns dos profesores da Universidade de Vigo que ofrecerán conferencias na quenda de mañá para o alumnado.
Aos anteriores expertos e expertas súmanse as e os conferenciantes da tarde que, a partir das 19:30 horas, exporán na sala multiúsos do auditorio. A arquitecta Patricia Muñíz, os profesores e investigadores Raquel Pérez-Orozco e David Patiño e o físico Jorge Mira serán os encargados de achegarnos cada tarde a ciencia abordándoa dende diferentes sectores e puntos de vista. Como non podía ser doutro xeito, a Semana das Ciencias tamén quere destacar e poñer en valor aos nosos científicos locais e teremos a ocasión de escoitar a Sergio Quiroga, de Ecocelta, e Fernando Castro e Pablo Moure, de Galinsect.
Como cada ano a Semana das Ciencias rematará coa celebración da Feira das Ciencias que este ano se desenvolverá na contorna da Casa do Concello. Máis de vinte stands amosarán as habilidades científicas da nosa comunidade educativa pero tamén será unha boa ocasión para asinar e mercar o libro da escritora Isabel Blanco “Galegas na ciencia” ou o libro da filóloga Dores Pereira e da artista e arquitecta Paula Lago “Herbas da noite”.
Ao longo da semana as familias poderán achegarse á ciencia gozando tanto das actividades de animación programadas en diferentes prazas do centro urbano como da exposición que acolle o hall do auditorio, “A maleta dos océanos”, da artista ferrolá María Lorenzo ou do ciclo de conferencias gratuítas.
“A Semana das Ciencias de Ponteareas supón unha oportunidade única de escoitar aos mellores expertos de Galicia abordar temas tan actuais como as crises humanitarias e o acollemento de refuxiados de guerra ou tan importantes para o noso futuro como as consecuencias do cambio climático e as múltiples formas de contelo”, explica a alcaldesa.
Cristina Fernández Davila explica ademais que esta iniciativa permite á mocidade de toda a comarca e de toda a área metropolitana coñecer aos nosos científicos e científicas e provoca un encontro case individual entre conferenciantes e público abríndose no peche de cada palestra unha quenda de participación.
