As Neves terá este ano 10.000 árbores autóctonas máis, logo dunha nova xornada de plantación que se desenvolverá o vindeiro 17 de novembro a partir das 10 da mañá, nunha iniciativa impulsada polo Concello coa colaboración da empresa ONE OAK, as Comunidades de Montes e ‘Voluntariado das Neves’.
O obxectivo para este día é plantar 1.500 árbores, entre freixos e vidueiros, na contorna do Camiño dos Pescadores. Con estas 1.500 novas árbores, serán un total de 10.000 árbores autóctonas as que se teñan plantado nas Neves no último ano, doadas por ONE OAK, a través do seu proxecto RENACER.
Aquelas persoas que queiran participar, axudando a plantar estas 1.500 árbores, poden facelo anotándose nesta ligazón.