Eva García de la Torre solicitou que Madrid “honre debidamente ao noso arquitecto Antonio Palacios, que deixou unha obra tan destacada nesta capital, coa concesión do nome dunha rúa sobranceira da cidade”. A alcaldesa do Porriño fixo esta petición o serán de onte no Círculo de Belas Artes de Madrid e ante un auditorio ateigado de público que asístía a presentación do libro de Álvaro Bonet Trazar la mirada. Cuaderno de viaje de Antonio Palacios.
Antes do comezo do acto, a alcaldesa do Porriño conversou coa a vicepresidenta terceira do Goberno, a galega Yolanda Díaz, que non quixo faltar a esta presentación. Ámbalas dúas recibiron un agasallo da directiva do Círculo de Belas Artes.
A rexedora reivindicou que “dende a nosa chegada ao Concello do Porriño temos traballado de arreo para recuperar a maioría dos cadernos de debuxos de Antonio Palacios que serviron para editar libros como este que estamos a presentar hoxe, Trazar la mirada. Cuaderno de viaje de Antonio Palacios, editado por “Engaiolarte”.
Na súa intervención, Eva García reivindicou a “enorme transcendencia de Antonio Palacios como urbanista cunha pegada innegable en Vigo e no Porriño e tamén en Madrid onde deixou un legado impresionante do que unha mostra é este edificio do Círculo de Belas Artes onde nos atopamos”.
Pola súa banda, o autor do libro, Álvaro Bonet, agradeceu a colaboración do Concello do Porriño e da súa alcaldesa que lle permitiu acceder ao fondo documental de Palacios que se ten recuperado.
