O concelleiro de Infraestruturas do Concello do Porriño, Pedro Pereira, vén de convocar á veciñanza da rúa Aloques a unha xuntanza informativa que terá lugar o vindeiro martes día 13, ás 19 horas, no salón de sesións do Concello. Trátase de explicar polo miúdo o plan de obra para executar o proxecto de humanización da devandita rúa.
Os traballos comezarán o luns 19 a cargo da empresa adxudicataria. O Concello do Porriño sacou a licitación pública a humanización da rúa Aloques, cun orzamento de 422.636 €, con cargo ao Plan Concellos 2020.
Este proxecto do goberno municipal, a proposta do concelleiro de Infraestruturas, Pedro Pereira formula o tratamento deste espazo urbano cunha mellora que abrangue a renovación e ampliación dos servizos existentes. A tal fin cómpre a demolición do firme actual e a súa substitución por un enlousado en pedra. E ademais acometerase a recollida de pluviais, saneamento, abastecemento de auga, telecomunicacións e electricidade.
A rúa Aloques quedará de tránsito peonil, sen tráfico de vehículos agás residentes, segundo o proxecto que foi presentado previamente polo concelleiro de infraestruturas aos residentes na reunión que celebraron o 5 de decembro de 2019 na casa do Concello.
