O Concello de Mos e o Centro de Información á Muller organizan as Xornadas “MULLER E TRABALLO”. Son unhas xornadas de formación, educación e sensibilización que se celebrarán os días 19 e 20 de abril no Pazo de Mos en horario de tarde, de 16:00 a 20:30 horas.
Polos perfís tan variados dos profesionais que participan, serán moi completas e interesantes. Pódese aproveitar para expor situacións e preguntas concretas que a todos/as nos axuden a coñecer mellor a situación laboral, os dereitos das mulleres e como poder exercelos.
Na xornada inaugural, o día 19 de abril, contarase coa presenza da medallista olímpica Teresa Portela e o presentador deportivo da TVG, Terio Carrera. Esa primeira tarde a sesión comezará ás 16:00 H cunha charla sobre dereitos laboráis, excedencia por coidado de fillos/as segundo homes e mulleres, excedencias por coidado de familiares dependentes, e reducións de xornadas a cargo da ponente Beatriz Lago (Avogada).
Ás 16:50 h falarase sobre a carga mental, síndrome BURNOUT: a tarefa invisible das mulleres, a culpabilidade e o benestar emocional, como afecta á saúde a carga mental, estratexias para repartir o peso do foga…. Conducirá a charla Fernando Tellería (Psicólogo).
Logo chegarán as intervencións institucionais a cargo de Elena Mancha, Directora de Relacións Laborais da Xunta de Galicia e de Nidia Arévalo, alcaldesa do Concello de Mos. E de seguido, será a mesa redonda con Teresa Portela (deportista) e Terio Carrera (xornalista) sobre conciliación e corresponsabilidade: os valores e a corresponsabilidade, os valores que lle ensinamos aos nosos fillos/as coa nosa actuación, educar no modelo de corresponsabildidade, e métodos para evitar conflitos coas tarefas do fogar
Esta primeira xornada culminará ás 19:10 H co inicio da charla sobre muller e discapacidade: dobre discriminación no acceso ao traballo.
TERESA PORTELA, Subcampioa Olímpica en Tokio 2020. Primeira muller española en participar en 6 Xogos Olímpicos (Sydney 2000, Atenas 2004, Beijing 2008, Londres 2012, Río 2016, Tokio 2020) con 5 diplomas olímpicos, e una medalla de prata nos Xogos Olímpicos de Tokio 2020 en K1 200 metros. Outro dos seus retos conseguidos foi compaxinar a súa carreira deportiva coa súa formación académica, graduándose no Grao de Fisioterapia e Diplomatura de Maxisterio de Educación Física. A todo isto, súmase a súa maternidade, a difícil tarefa de conciliar o traballo coa súa vida familiar.
TERIO CARRERA. Periodista deportivo os últimos 34 anos. Traballa na TVG.
Tamén se contará ao día seguinte, 20 de abril, con ÁGUEDA GÓMEZ SUÁREZ, que falará sobre “O malestar que non ten nome: académicas en tempos de pandemia”. É Directora da Unidade de Igualdade da Universidade de Vigo. Profesora titular de universidade na área de socioloxía. Doutora en Socioloxía pola Universidade de Santiago de Compostela e licenciada en Socioloxía pola Universidade Complutense de Madrid, desenvolveu o seu traballo de investigación sobre cuestións relacionadas cos prexuízos de xénero na ciencia e a sociedade dixital. Dirixiu dezaoito investigacións como Investigadora Principal e publicou once libros.
