O pazo de Mos acolle hoxe sábado ás 20:00 horas a actuación de O Fiadeiro Danza 3, o ciclo promovido pola Xunta de Galicia, o propio Fiadeiro, a formación Xacarandaina e Cantigas e Agarimos, que chega este ano á súa undécima edición difundindo a danza e a música tradicionais de Galicia.
Esta programación, que comezou o pasado 16 de abril coa representación de Cantigas e Agarimos en Vedra, continuará ata o mes de outubro ata chegar os 18 concellos galegos coa súa respectiva cita coa cultura popular galega, a maior parte delas en localizacións exteriores e formatos que facilitan o encontro do público.
Mos, Allariz, Arteixo, Carnota, Cerdedo-Cotobade, Dumbría, Gondomar, Lourenzá, Manzaneda, Monforte de Lemos, Muros, Narón, Rianxo, Ribeira, Salvaterra do Miño y Vilanova de Arousa completan a relación de localidades participantes este ano en Danza 3, que leva a cabo no marco dun convenio de colaboración entre a Axencia Galega das Industrias Culturais e o colectivo XOC, que aglutina as devanditas agrupacións culturais.
A Consellería de Cultura, Educación, Formación Profesional e Universidades renova así a súa colaboración anual co colectivo XOC, que traballa para darlle visibilidade ao folclore galego, tanto a través das actividades de exhibición que realizan dentro e fóra das súas sedes como dos cursos de formación e de recuperación desta parte do patrimonio inmaterial galego.
O FIADEIRO
Dende o seu nacemento no ano 1996, o obxectivo da ACF O Fiadeiro vén sendo a recuperación da cultura tradicional galega, con interese principal nos bailes, músicas e cantares dos nosos devanceiros, nun incesante traballo de investigación etnográfica e traballos de campo.
A alcaldesa mosense, Nidia Arévalo, e Sara Cebreiro, concelleira de Cultura, amosaron a súa ilusión por poder contar unha vez máis co apoio da Xunta para “facer difusión da nosa cultura e das nosas tradicións, neste caso con esta actuación” e comentaron que “un total de 50 persoas no escenario, repartidas nas diferentes seccións de baile e música, interpretarán temas variados, en canto a o que se refire a ritmos e formacións”.
“Por iso animamos a todos os veciños a acudir ao Pazo de Mos para gozar desta función, xa que O Fiadeiro creará un espectáculo único, espontáneo e persoal, polo que non haberá dous espectáculos iguais”, concluían as representantes municipais Arévalo e Cebreiro.
