21.5 C
Pontevedra
Venres, 19 de Abril de 2024
Máis
    HomeLouriñaMosMos incrementa o volume da reciclaxe en preto dun 18 % no...

    Mos incrementa o volume da reciclaxe en preto dun 18 % no último ano

    A alcaldesa e o concelleiro de Recollida de Residuos agradécenlle á cidadanía "o seu esforzo para acadar tan bos datos" que sitúan ao municipio por enriba da barreira dos 36 quilos anuais reciclados por habitante

    A alcaldesa de Mos, Nidia Arévalo, e o concelleiro de Recollida de Residuos, Gonzalo Alonso, fixeron onte balance das porcentaxes de reciclaxe da veciñanza mosense no último ano, aportando datos que sitúan ao municipio con preto do 18 % de incremento con respecto ao ano anterior

    Arévalo e Alonso sinalaron que, tras facer cálculos de reciclaxe por habitante durante o ano 2019 e en comparativa co ano anterior, “nas estatísticas apréciase un incremento de reciclado por habitante de ata os 36,19 quilos por habitante e ano, o que representa un incremento do 17,37% no volume de reciclaxe con respecto ao ano 2018 (30,83 quilos por habitante e ano)”.

    Destaca así mesmo o importante incremento no reciclado en todas as partidas: un 16,23 % en envases lixeiros, un 20,68 % en papel e cartón; e un 15,29 % en vidro. Polo que Arévalo e Alonso agradécenlle á cidadanía “o seu esforzo para acadar tan bos e esperanzadores datos”.

    Aínda que queda moito camiño por andar e siguen existindo verquidos incontrolados no municipio, o certo é que as cifras de reciclaxe suben en todos os seus parámetros. Tamén melloraron os datos de 2019 respecto de 2018 en orgánica, voluminosos e outros; e vexetais-podas. En orgánica o incremento foi do 2,18%, en voluminosos do 34,35% e en podas do 189%.

    “Cada vez estase reciclando máis en Mos e esa é unha moi boa nova para este municipio que ademais está adherido ao Pacto dos Alcaldes polo Clima e a Enerxía e moi sensibilizado coas políticas medioambientais” declararon os representantes municipais. O concelleiro Gonzalo Táboas informou ademais de que actualmente desde o seu departamento estanse a revisar todas as parroquias para reforzar os puntos de recollida de residuos para repoñer e aumentar o número de colectores e incluso crear novos emprazamentos de ser necesario.

    Táboas aproveitou ademais para lembrar o servizo de Punto Limpo no Polígono da Veigadaña, aberto ao público de luns a venres de 10 a 14 horas e de 16.30 a 20.30 horas e os sábados en horario matinal de 10 a 14 horas. E recordou tamén que a empresa concesionaria do servizo municipal de recollida de lixo conta cun teléfono para solicitar a recollida a domicilio de enseres voluminosos e restos de poda, o 900 720 190, operativo de luns a venres de 9 a 13 horas.

    Para continuar nesta liña ascendente as concellerías de Recollida de Residuos e Medio Ambiente Sostible que dirixen Gonzalo Táboas e Leo Costas, respectivamente, iniciarán conxuntamente coa empresa de recollida de lixo, Urbaser, unha campaña de sensibilización que comezará entre finais de abril e principios de maio. Constará de charlas didácticas sobre reciclaxe que serán impartidas nas asociacións das 10 parroquias do Concello de Mos.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.