O Concello de Mos vén de adquirir para a súa Policía Local un total de 10 chalecos antibalas SIOEN modelo ITEPOL FLEX con funda exterior, protector de cremalleira, e galoneiras de ombreiro.
Así o informaron hoxe a alcaldesa mosense, Nidia Arévalo, e o Xefe da Policía Local de Mos, Gerardo Álvarez, quenes explicaron que se trata dun material que foi testado e sometido ás pertinentes probas técnicas de protección balística e resistencia a armas brancas, sendo considerado o máis seguro e apropiado para o desenvolvemento das funcións dos axentes mosenses.
Este chaleco, dentro dos modelos presentados, é o que mellor se adapta ás especificacións solicitadas e o máis apropiado para o servizo na Policía de Mos.
Entre as características do novo material adquirido pola administración local mosense atópase que cada axente portador do chaleco en cuestión poderá afrouxalo ao sentarse no vehículo patrulla, proporcionando máis comodidade sen necesidade de ter que sacalo.
O Xefe do Corpo Local, Álvarez Reguero, destacou que “consideramos que o peso do chaleco, unido á comodidade ofrecida nas diferentes probas, permitirá portalo durante todo o servizo”. Ademais conta cunha garantía do panel balístico de 10 anos e da funda exterior de 2 anos.
Os novos chalecos antibalas SIOEN modelo ITEPOL FLEX teñen un peso por unidade de 2,7 Kg cunha área de protección de 0,30 metros cadrados e protección 360º grazas ao solapamento lateral dos paneis de máis de 3 cm. Son sistemas de protección persoal eficiente cunha elevada resistencia tamén fronte a armas brancas.
O Concello de Mos vén de investir preto de 8.000 euros de fondos propios na adquisición destes 10 chalecos que protexerán aos 8 axentes locais mosenses.
