Deporte seguro en Mos, reabre a Piscina Municipal

A Piscina Municipal reabre hoxe tras permanecer pechada desde marzo

Hoxe ás 08.00 horas da mañá entraban pola porta do Pavillón Óscar Pereiro os primeiros usuarios da Piscina Municipal de Mos desde que o pasado mes de marzo cesara a súa actividade por mor da crise sanitaria da COVID-19.

Tratouse de 4 nadadores/as que acudiron ás instalacións deportivas mosenses a realizar a primeira sesión de nado libre tras o inicio da pandemia. Con todas as medidas e protocolos de seguridade e prevención en marcha, puideron gozar de 1 hora de práctica do seu deporte favorito.

Primeiros/as usuarios/as en acceder á Piscina Municipal de Mos esta mañá ás 08.00 horas, tras permanecer pechada desde o pasado mes de marzo.

O novo protocolo de nado libre na Piscina Municipal de Mos establece unha persoa por rúa (ata un máximo de 6 persoas ao contar o vaso cun total de 6 rúas) que debe ter reservado o mesmo horario para todo o mes. Os horarios distribúense ao longo do día en sesións de unha hora repartidas entre as 08.00 horas da mañá e as 22.00 horas os luns, mércores e venres; e entre as 08.00 horas da mañá e as 20.45 horas da tarde os martes e xoves. Os luns, mércores e venres hai polo tanto 9 sesións de unha hora dispoñibles para os nadadores e nadadoras que van por libre; e os martes e xoves 7 sesións dunha hora.

Por outra banda, tamén comezan as clases de aquagym tanto para o público xeral como para os/as usuarios/as do programa municipal ‘Exercítate’ para maiores (no caso do ‘Exercítate’ iniciaranse o 1 de outubro). Estas clases impártense con aforo limitado e utilizando a piscina completa para realizalas. Tamén contan con horarios de mañá e de tarde e requiren de reserva previa. Os luns só se imparte unha sesión de tarde, mentres que os martes, mércores e xoves hai dúas sesións de mañá (unha delas do ‘Exercítate’) e unha de tarde; e os venres dúas sesións de mañá, unha das cales dentro do programa ‘Exercítate’.

No caso do ximnasio do Pavillón Óscar Pereiro, este abrirá as súas portas e reanudará a súa actividade de cara ao vindeiro 15 de outubro, tamén en turnos de unha hora, previa reserva no mesmo horario para todo o mes por parte dos/as usuarios/as. Os luns, mércores e venres habilitaranse 9 turnos de uso entre as 08.00 horas da mañá e as 22.30 horas da noite; e os martes e xoves 6 turnos dunha hora entre as 08.00 horas da mañá e as 21.00 horas.

Primeiros/as usuarios/as en acceder á Piscina Municipal de Mos esta mañá ás 08.00 horas, tras permanecer pechada desde o pasado mes de marzo.

Todas as reservas para os servizos dispoñibles no Pavillón Óscar Pereiro deberán facerse por teléfono no 986 33 40 70 e pódese chamar para reservar tanto de mañá de 09.00 a 14.00 horas como de tarde de 16.00 a 22.00 horas.

Ademais, entre os diversos protocolos activados nas instalacións deportivas municipais, o mes pasado os monitores deportivos municipais do Pavillón Óscar Pereiro e Piscina Municipal recibiron unha formación específica en prevención da COVID-19.

Durante o curso, impartido pola empresa de prevención Cualtis e coordinado polo departamento municipal de Persoal, Recursos Humanos e Pevención de Riscos Laborais, os monitores deportivos do Concello de Mos foron instruídos sobre o protocolo de seguridade e sanitario de prevención da COVID-19 a seguir por eles mesmos e o deseñado para os/as usuarios/as das instalacións deportivas do Pavillón Óscar Pereiro, que os monitores deben garantir que sexa cumprido por parte da cidadanía e dar as indicacións oportunas para que se faga correctamente.

As directrices preventivas a seguir estarán sempre baseadas no rigoroso cumprimento dos protocolos de seguridade sanitarios e no asesoramento técnico especializado para poder adaptarse correctamente ás circunstancias da nova realidade derivada da COVID-19.

Neste senso a alcaldesa de Mos, Nidia Arévalo, e a concelleira de Deportes, Begoña Toucedo, insisten en que, “desde o Concello primamos a seguridade e a saúde da cidadanía, cumprindo escrupulosamente os protocolos sanitarios, e as medidas, recomendacións e normas establecidas neste senso; e priorízanse a prudencia e a cautela por riba de todo”.