A empresa Congelados el Mar decidiu ven de confirmar a súa intención de deixar o Polígono Industrial de Monte Faquiña, en Tameiga, debido á pretensión da Comunidade de Montes de subir o prezo do canon polo uso dos terreos, a inseguridade que supoñería para a empresa realizar novos investimentos nun chan que non poderá ser adquirido e “ante a posibilidade de que os propietarios volvan cambiar a regras do xogo”, tal e como ocorreu agora, “cando os comuneiros asumen a propiedade destas parcelas e non respectan os acordos existentes anteriormente co Concello de Mos para o seu uso”, explica a Plataforma Empresariado Galego.
A empresa solicitou unha moratoria ata o mes de outubro para poder trasladar a planta e aproveitará este traslado fora do termo municipal de Mos para realizar os investimentos de modernización que inicialmente pensaba realizar no municipio.
Congelados el Mar usaba terreos de Monte Faquiña en base a unha concesión legal do Concello de Mos e este ano debía renovar a mesma. Con todo un fallo xudicial entendeu hai dous anos que os terreos industriais desta zona son propiedade veciñal. A partir de aí a Comunidade de Montes decidiu subir os prezos dos canons dos terreos de Monte Faquiña sen respectar os acordos anteriores, nalgúns casos ata un 1.200 %.
As instalacións de Congelados el Mar de Monte Faquiña corresponden á delegación Vigo-Ourense desta empresa e nela traballan 26 persoas. O grupo adquirira, a principio da década do 2000, as plantas da empresa Onda Congelados, pertencente ao grupo Vegalsa e con ela a concesión administrativa da parcela na que levantou as instalacións, o que esixiu un alto investimento atendendo á dotación de cámaras frigoríficas preparadas para o almacenamento e distribución dos produtos conxelados.
Non é a única empresa que considera desproporcionada a subida dos terreos por parte da Comunidade de Montes. Varias mercantís iniciaron un proceso xudicial para que se respecten os acordos e pactos co Concello de Mos, anteriores á sentenza xudicial que dá á Comunidade de Montes a titularidade dos terreos.
Os veciños chegaron a esta titularidade pleiteando co Concello de Mos e a pesar de que o terreo non era de aproveitamento forestal xudicialmente fallouse a favor da clasificación.
A semana pasada tivo lugar unha audiencia previa que tiña por obxecto buscar unha vía de diálogo coa Comunidade de Montes co fin de poder chegar a un entendemento amigable coa mesma. Con todo, afirma a Plataforma Empresariado Galego “os representantes da Comunidade de Montes de Man Común de Tameiga negáronse a negociar acordo algún polo que o trámite xudicial concluíu sen achegar posturas e o procedemento xudicial segue o seu curso estando prevista unha vista para o mes de novembro”.
El Mar
A empresa Congelados el Mar é unha gran firma estratéxica na zona. Trátase unha das 6 marcas do grupo Pescapuerta, xunto a Pescapuerta, Esquimal, Pescar, Fortitude e Loligo. O Grupo ocupa o terceiro posto na clasificación de operadores de produtos conxelados en España, detrás de Nova Pescanova e Iberconsa. Superou unha facturación en vendas de máis de 250 Millóns de euros no exercicio 2019 e ten un volume de 65.000 toneladas de comercialización.
Elmar Frozen Food, é a distribuidora dos produtos do Grupo dirixida principalmente á canle Horeca e Retail, obtivo un crecemento do 4,3 % chegando ata os 77,2 millóns de euros de vendas.
A marcha de Mos é unha gran perda para o Polígono de Monte Faquiña polo que poida supoñer para o emprego, investimentos e sinergías con outras empresas locais, xerando riqueza en toda a zona. Esta marcha e outras que se poidan producir debido ao encarecemento dos terreos preocupa ao sector empresarial de Mos.
