Este pasado mércores, o alumnado de 5º e 6º cursos de Educación Primaria do CEIP de Atín-Cela –un total de 40 alumnos e alumnas–, fixo unha saída á zona dos Muíños da Salgueira, na parroquia de Pereiras para retirar lixo da zona, acompañados do veciño da zona, Daniel Lago Pérez, e de voluntarios e voluntarias de Protección Civil de Mos.
Segundo explica Daniel Lago “desde a Asociación de Veciños Nosa Terra de Pereiras viñamos de realizar previamente labores de desbroce na zona descubrindo moitos desperdicios que se atopaban ocultos baixo a masa verde”.
O certo, sinala Lago é que “tanto alumnado como profesorado do CEIP de Atín sensibilizáronse enormemente desde o principio, prestándose voluntarios para retiralo demostrando unha gran concienciación medioambiental”.
Tal e como informan os mestres responsables desta iniciativa, Edu e Fani, “esta visita estivo emarcada dentro do programa presentado á Voz Natura e que, baixo o nome de Refugallo Cero, pretende concienciar ao alumnado sobre a importancia de ser cosumidores responsables, reducir os resudios xerados e reciclar. Así mesmo, procura concienciar ao alumnado sobre a contaminación que produce o noso lixo no entorno”.
Tratouse dunha saída tan medioambientalmente comprometida que ata os escolares non realizaron uso de ningún tipo de transporte, como o autocar, que producise emisións, senón que se dirixiron a pé desde o centro educativo ata a zona dos Muíños da Salgueira, onde ademáis de atoparse con veciños e veciñas do lugar -con algúns ata compartiron charla no lavadoiro- recibiron a visita dos concelleiros de Educación, Julia Loureiro, e de Medio Ambiente, Leo Costas.
