26.5 C
Pontevedra
Venres, 19 de Xullo de 2024
Máis
    HomeBaixo MiñoTuiTui e a Deputación executarán a primeira fase da humanización do Paseo...

    Tui e a Deputación executarán a primeira fase da humanización do Paseo da Corredoira

    O presidente da Deputación de Pontevedra, Luis López; e o alcalde de Tui, Enrique Cabaleiro, asinaron este mércores un convenio de colaboración enmarcado no Programa Provincial de Infraestruturas e Dotacións Singulares para a Execución da Axenda 2030 (PON2030) a través do cal o goberno provincial financiará con 795.715 euros euros, o 80 % do orzamento, a primeira fase do proxecto de mellora urbanística da rúa Augusto González Besada e a zona sur do Paseo da Corredoira. O Concello, pola súa banda, achegará o 20 % restante (198.928 euros).

    A obra consiste nunha intervención integral nesta contorna que dá acceso ao centro urbano de Tui. O obxectivo é dar prioridade á mobilidade peonil e mellorar a imaxe destas rúas, así como reordenar e reducir a presenza de vehículos “para mellorar unha das principais arterias desta cidade”, explicou o presidente da Deputación de Pontevedra, Luis López, despois de asinar o protocolo.

    En concreto, na rúa Augusto González Besada crearase unha plataforma única con ampliación das beiravías, instalación de novos elementos de mobiliario urbano e arborado e modificación do estacionamento en batería por aparcamento en liña. O mesmo ocorrerá na transversal rúa de Rosa Bahamonde, mentres que no acceso ao edificio da Policía Local crearanse dúas ramplas. Ademais, na Praza da Inmaculada, renovarase tamén o pavimento, instalarase novo mobiliario urbano e substituiranse dúas árbores que afectaban á zona dos quioscos.

    A intervención nesta praza conectará directamente coa zona sur do paseo da Corredoira, onde se substituirá o adoquinado por unha lousa de granito, crearanse zonas de aparcamento de carga e descarga e, no paseo, melloraranse os elementos do mobiliario urbano. Para unha actuación futura, correspondente a segunda fase do proxecto, queda a mellora urbana da zona norte do Paseo da Corredoira e da rúa Camilo José Cela.

    Segundo recolle o convenio, as obras, valoradas nun total de 994.643 euros, deberán estar rematadas antes do 30 de abril de 2025. A sinatura deste acordo entre Deputación e Concello de Tui realízase coa modificación das bases do programa PON2030 xa en vigor. Unha modificación que fai compatible a achega da Deputación coas subvencións doutras administracións sen que o montante concedido ao Concello polo goberno provincial se vexa reducido.

    “Os concellos son o faro que guían a nosa acción de goberno”, asegurou o presidente Luis López, quen recordou que o recentemente presentado Orzamento provincial reserva un de cada tres euros dos 189 millóns das contas provinciais para o Servizo de Cooperación cos concellos da provincia. “Son as contas máis municipalistas da historia, subliñou o dirixente provincial facendo referencia tamén ao programa +Provincia, “o maior plan de obras e servizos posto nunca en marcha polo goberno provincial”, remarcou López.

     “Tui e os demais concellos sodes o motor da provincia. Xuntos imos conseguir que Pontevedra vaia a máis”, concluíu o presidente da Deputación.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.