14.6 C
Pontevedra
Domingo, 25 de Febreiro de 2024
Máis
    HomeBaixo MiñoTomiñoTomiño pon en marcha 'Reactívate' con máis dunha ducia de actividades de...

    Tomiño pon en marcha ‘Reactívate’ con máis dunha ducia de actividades de envellecemento activo

    Mellorar a calidade de vida das persoas maiores con actividades que favorezan a participación social e o mantemento de facultades físicas e psíquicas. Ese é o obxectivo do programa de maiores Reactívate, un plan de envellecemento activo e de hábitos saudables posto en marcha pola concellería de Benestar Social, Igualdade e Educación do Concello de Tomiño con máis dunha ducia de actividades dirixidas a persoas maiores de 60 anos. Todas as persoas interesadas en participar poden inscribirse xa de forma presencial nas oficinas de Rexistro do Concello de Tomiño.

    Trátase dun programa ideado para fomentar a vida activa entre as veciñas e veciños de maior idade da vila, ofrecendo “un completo plan de actividades que lles resulten de interese e útiles para a súa vida cotiá. O obxectivo destes obradoiros, cursos, saídas e actividades é axudarlles a seguir en activo, animalos a saír do seu fogar, a manter a súa autonomía persoal e a relacionarse con máis xente tanto da súa idade como máis nova”, explica a concelleira de Benestar, Educación e Igualdade, Cristina Martínez, que anima a todas e todos os maiores do municipio a participar no programa.

    Máis dunha ducia de actividades impartidas por expertos coas que favorecer a estimulación cognitiva ou a mobilidade, manter o ton físico e cognitivo, diminuír o risco de padecer enfermidades… pero tamén coas que achegar aos maiores de Tomiño a outro tipo de actividades menos habituais entre as persoas con máis de 60 anos.

    As persoas interesadas en participar neste programa poderán desfrutar de actividades como risoterapia, informática, ximnasia e pilates, accións para a promoción da saúde ou manualidades, ademais de actividades coa comunidade, un club de lectura, un cinefórum ou roteiros saudables. Xunto con estas nove actividades tamén están programados catro obradoiros de expresión corporal, memoria, escritura creativa e xogos da nosa vida.

    As actividades comezarán o vindeiro 1 de outubro e desenvolveranse martes e venres en horario de mañá no Centro Vontade. Terán un custe de 15 euros mensuais. Para recibir máis información ou realizar a solicitude de inscrición as e os interesados poden dirixirse ao Concello ou chamar ao teléfono 986 622 001 entre as 08 h e as 15 horas.

    LIBROS

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.

    Fran Fernández Davila, «Groenlandia»

    A Fran Fernández Davila gústalle sorprender cos seus traballos literarios, descolocar ao lector para levalo por paisaxes pouco transitadas física e emocionalmente, escapar da rutina diaria e, cunha forte carga de imaxinación, argallar historias nas que a intriga e o humor acaban por se converter en personaxes convidadas da trama.