13.7 C
Pontevedra
Mércores, 22 de Maio de 2024
Máis
    HomeBaixo MiñoTomiñoO PSOE de Tomiño lamenta que se achaque a “temas políticos” a...

    O PSOE de Tomiño lamenta que se achaque a “temas políticos” a dimisión do Concelleiro de Tráfico

    As e os socialistas tomiñeses aseguran que simplemente se debe “a unha serie de posibles infraccións” que en ningún caso foron desmentidas públicamente

    Ante a publicación dun post nas redes sociais no que se involucraba supostamente ao concelleiro de Tráfico de Tomiño en diversos incidentes –acontecementos que remataron coa dimisión do edil– e as acusacións, totalmente carentes de fundamento, de ser unha campaña orquestada polo PSOE tomiñés, as e os socialistas do municipio veñen de facer unha serie de matizacións de cara a clarificar os feitos.

    A agrupación socialista foi coñecedora dos acontecementos nos que estaba presuntamente involucrado o concelleiro de Tráfico “a noite do 14 de abril a través dunha publicación subida ás redes sociais”. Os feitos relatados, engade a Agrupación Socialista de Tomiño, “non foron desmentidos nin de maneira persoal nin oficial” e, ante o malestar e preocupación da veciñanza por ditos incidentes “fixemos pública a nosa intención de pedir explicacións en sede plenaria” e, de non darse ou ser insuficientes, as e os socialistas pedirían “que se asuman as responsabilidades pertinentes” algo que, recalca o PSOE, “non é máis que cumprir coa nosa obriga de darlle voz aos veciños e veciñas que así o demandan”.

    En todo caso, “as responsabilidades neste turbio asunto son exclusivamente da persoa ou persoas implicadas”, polo que lamentan que se lle bote a culpa a “motivos políticos” xa que a súa dimisión “ven motivada por uns supostos feitos e non por unha suposta polémica política”.

    O certo é que nas redes aparecen publicadas “unha serie de posibles infraccións que nin foron desmentidas publicamente nin se teñen presentado probas da súa falsedade”.

    O PSOE tomiñés cualifica cando menos de “curioso” que 20 días despois dos feitos que deron orixe á dimisión do concelleiro “resulte que a culpable é a oposición” o que leva a preguntar “en base a que, e con que fundamentos, probas ou evidencias, faise esta acusación?”

    Doutra banda as e os socialistas botan en falta “un comunicado oficial da Alcaldía, ante a evidencia de ter aceptada a dimisión do seu edil” e lembran que os cargos públicos e políticos “debemos dimitir se hai razóns para elo, asumindo as responsabilidades e consecuencias dos nosos actos” pero apuntan que “o que non é normal en democracia é culpar á oposición dos erros propios”.

    Finalmente entenden que Alcaldía de Tomiño “está contribuíndo a esta anormalidade democrática, cando permite que se vertan este tipo de acusacións falsas e infundadas co único fin de desviar a atención”.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.