Na sesión plenaria do Concello de Tomiño, celebrada o pasado xoves 10 de agosto, tratouse, entre outros temas da orde do día, a aprobación inicial da modificación puntual n° 10 do plan xeral de Tomiño para, nun futuro, implantar solo industrial no concello. Dita modificación abrangue unha zona comprendida dende Goián ata Estás –a maioría de solo rústico a industrial, urbanizable e de dominio público–, cunha lonxitude de 3 quilómetros e unha superficie de actuación de 1.134.000m2.
En marzo do ano 2021, tal e como sinalan as concelleiras socialistas Violeta de Santiago e Marta Misa, este proxecto foi presentado á Xunta de Galicia, “pero nin os propietarios e afectados nin a oposición tiveron coñecemento desta actuación ata o de agora”.
Preguntanse as concelleiras socialista como é posible que un proxecto desta envergadura leve oculto durante anos e, a vista dos feitos, denuncian unha vez máis “a falta de transparencia e o escurantismo practicado sistematicamente polo goberno nacionalista, neste caso, nun tema tan importante como a ordenación do noso territorio”.
O certo é que as e os afectados –engaden as concelleiras do PSdeG-PSOE– “queren saber si o desdobre da recta de Figueró está vinculado a este proxecto, si houbo algunhas persoas que se beneficiaron durante estes anos comprando terreos rústicos sabendo que ían a recalificarse como urbanizable ou empresarial e por que ao longo destes anos non houbo ningún contacto cos e coas propietarias para informarlles”.
A portavoz socialista, Violeta de Santiago explica a abstención do seu grupo neste punto “dadas as moitas preguntas que se fan os propietarios e propietarias dos terreos e para as que solicitamos resposta”. De Santiago afirma que “se ben é certo que Tomiño precisa urxentemente solo industrial, a transparencia, a participación veciñal e as boas prácticas son indispensables en procesos como este”.
Comisión de honras e distincións
As concelleiras socialistas levaron tamén a debate plenario a creación dunha comisión de honras e distincións en Tomiño, semellante á que existe na maioría dos Concellos, que permita regular a participación veciñal para elección de persoalidades no eido cultural e social para achegar o Concello á cidadanía e a transparencia do mesmo. A moción, transaccionada, foi finalmente aprobada por unanimidade.
Foi presentada tamén polo Grupo Socialista unha moción de urxencia, a petición da familia do pintor Mario Rodríguez –Tomiñés Distinguido no ano 2017–, na que piden o acordo do Pleno para que o Concello inicie negociacións para acometer a restauración dunha parte do seu legado pictórico e asine unha cesión temporal para que estes cadros sexan expostos na biblioteca municipal, Espazo Isaura Gómez, tal como era a vontade e desexo do artista.
A moción foi tamén aprobada por unamimidade, o que para Violeta de Santiago, “pon de manifesto a vontade do grupo socialista de facer política útil para os tomiñeses e tomiñesas”. Doutra banda tamén foi aprobada por unamimidade unha moción para esixir ao Sergas e á Xunta de Galicia a reapertura do consultorio de Goián, “demanda da veciñanza que segue sen cumplirse, e que as socialistas temen sexa unha estratexia electoralista de cara a vindeiras eleccións autonómicas”.
“Confiamos en que non sexa así –sinala Violeta de Santiago– e se reabra o consultorio médico de xeito inminente, pois é unha necesidade urxente da veciñanza, á que hai que darlle resposta xa”.
