Máis de 93 mil persoas realizaron en 2022 o Camiño Portugués. Segundo os datos proporcionados pola Oficina do Peregrino da Catedral de Santiago 93.184 peregrinos e peregrinas recibiron a “Compostela” logo de realizar o Camiño Portugués. Trátase do maior número rexistrado até o de agora nas estatísticas, e que representa un 21% dos peregrinos que chegaron a Compostela no ano santo 2022 (438.323 peregrinos). Estes datos consolidan á ruta portuguesa que entra en Galicia a través de Tui como a segunda en número de peregrinos e peregrinas.
Tendo en conta estes datos oficiais e o feito de que se estima que entre un 20 ou 25 % das persoas que realizan o Camiño non recollen a Compostela, pódese estimar que o número de peregrinos que pasaron pola nosa cidade achégase a un número próximo ás 120.000 persoas.
Tui, como porta histórica dos Camiño Portugueses en Galicia, foi escollida por un total de 33.719 persoas para iniciar a súa peregrinación ao sepulcro do apóstolo Santiago, o que supón un 38,18 % do total. Deste xeito, Tui consolídase como unha das catro localidades de inicio de todas as rutas xacobeas. Se sumamos os peregrinos que iniciaron o seu camiño en Valença, 11.950 (12,8 %), temos que na Eurocidade Tui-Valença comezaron a súa peregrinación o 47,48 % dos peregrinos do Camiño Portugués.
Portugal, Alemaña, Italia, EEUU, Reino Unido, Francia, República Checa, Eslovaquia, e México foron os principais puntos de orixe dos peregrinos internacionais que o ano pasado pola Oficina Municipal de Tui, onde se rexistraron persoas realizando o Camiño de até 59 países dos cinco continentes.
Pontevedra, Madrid, Barcelona, Sevilla, Valencia, Cádiz, Málaga, As Palmas ou León foron os principais lugares de orixe dos peregrinos e peregrinas nacionais, rexistrándose persoas de todas as provincias españolas na Oficina de Turismo tudense.
Na valoración dos datos de peregrinaxe de 2022 cómpre ter en conta que segundo a Oficina do Peregrino 30.609 persoas realizaron o Camiño Portugués da Costa, e un número crecente deles realiza esta ruta seguindo o trazado oficial do Caminho Portugués da Costa que dende Caminha chega ata Valença e Tui e non figuran conceptuados como peregrinos polo Camiño Portugués.
A nivel comparativo podemos lembrar que no ano 2019 (desbotando os ano 2020 e 2021 por mor da pandemia) os peregrinos polo Camiño Portugués alcanzaron a cifra de 72.357, por tanto os datos do ano 2022 supoñen un incremento do 29% no número de peregrinos polo Camiño Portugués. Crecemento exponencial de máis do 170% se atendemos aos datos do anterior ano santo no ano 2010, onde os peregrinos polo Camiño Portugués acadaron a cifra de 34.147.
Para o alcalde de Tui, Enrique Cabaleiro, estes datos ratifican a impresión que apuntaba a que este pasado ano 2022 o Camiño Portugués superaría amplamente o número de peregrinos verbo dos anos anteriores. Ao tempo que supoñen para todos os axentes implicados na xestión do Camiño de Santiago, tanto públicos como privados, na nosa cidade un reto para lograr manter estes niveis de peregrinos mediante un incremento da calidade na acollida e hospitalidade deste enclave histórico do Camiño Portugués que é a cidade de Tui.
