Os recursos de emerxencias acudiron esta noite a Covelo para axudar ao copiloto dun vehículo que quedou atrapado baixo o cadro de mandos despois de saírse da vía e dar unha volta de campá.
Segundo a información recollida no 112 Galicia, o sinistros produciuse preto das dez de onte na N120, entre Mondariz e Covelo.
Así o explicou unha persoa particular que chamou ao 112 para informar da situación dun vehículo fóra da vía e un ocupante con dificultades para saír. Con estes datos, o persoal do Centro Integrado de Atención ás Emerxencias de Galicia pediu a colaboración dos Bombeiros-GES de Ponteareas, así como dos voluntarios de Protección Civil de Oitavén-Tea, quen confirmaron que a persoa que viaxaba no asento do copiloto necesitaba axuda para abandonar o coche sinistrado, pero, aínda con todo, sen necesidade de aplicar os equipos de excarceración. Igualmente, confirmaron que a persoa quedou encaixada baixo o cadro de mandos tras dar o coche unha volta de campá.
Pola contra, o piloto saíu do vehículo polos seus propios medios e, xunto co copiloto, recibiu asistencia médica e mesmo foron trasladados ao centro hospitalario de referencia.
