Belén Carballo, actual concelleira do BNG no Concello de Covelo, vén de facer pública a súa candidatura á Alcaldía. Os nacionalistas veñen de depositar a súa confianza e apoio no bo facer da edil nos últimos anos. Natural de Godóns e licenciada en Socioloxía e Antropoloxía, colaborou como socióloga no proxecto Vidas con historia da Deputación de Ourense, na Reserva da Biosfera Transfronteiriza Gerés–Xurés. Nai de dous fillos, é quen de compatibilizar traballo con vida privada, pois é mestra de FP que da clases a un Ciclo Superior de Técnicas de Educación Infantil e a un Ciclo Medio de Atención a Persoas en Situación de Dependencia.
Malia todo, Belén aínda é quen de plasmar o seu compromiso co País exercendo como concelleira en Covelo dende o pasado ano 2020 e, xa na actualidade, dando o paso de liderar ao BNG de Covelo de cara a unhas eleccións municipais que terán lugar o vindeiro mes de maio.
A súa candidatura deuse a coñecer nun acto de presentación que tivo lugar o pasado domingo 12 de marzo na Reitoral de Santa Mariña, e que contou coas palabras da súa compañeira homóloga, Laura Santiso, e co Deputado no Parlamento Galego polo BNG, Luís Bará. Acompañados pola veciñanza e alcaldes do resto da Comarca polo BNG, a agrupación de Covelo da un paso ao frente e mostra que afronta o que se prevé sexa unha campaña pragada de esforzos, mais tamén de ilusión e gañas de converter a Covelo nun dos Concellos BNG da Comarca.