17.6 C
Pontevedra
Luns, 15 de Abril de 2024
Máis
    HomeA ParadantaArboArbo, viño e adegas

    Arbo, viño e adegas

    Unha ducia de adegas conforman a industria do viño en Arbo

    O municipio de Arbo é o prototipo de zona que conta cun microclima propio. A influencia atlántica da que gozan estas terras, con temperaturas suaves e precipitacións abundantes, permítelle dispoñer das horas de sol necesarias para que as uvas alcancen o seu punto exacto de madurez e, chegado o momento, poida dar un viño de excepcional calidade lexitimado por unha historia secular.

    Encadrados dentro da Denominación de Orixe Rías Baixas, os viños de Arbo presentan exhaustivos controis de calidade que comezan xa nas propias parcelas, coa inspección das mesmas e o estudo das características dos viñedos. Estes rigorosos controis continuarán, posteriormente durante a vendima, comprobando a uva que entra en cada unha das adegas.

    “Un total de doce adegas conforman a industria do viño en Arbo, sendo a actividade vitivinícola base da economía para os arbenses, que de forma tradicional seguen mantendo os seus viñedos e os seus viños, moitas delas cunha tradición familiar, con coñecementos transmitidos de pais a fillos”, informa o alcalde de Arbo, Horacio Gil.

    As adegas de Arbo souberon estar á altura das circunstancias e adecuáronse ás novas técnicas de produción, pero sobre todo souberon atopar o máis difícil, o punto xusto de compatibilidade entre o cultivo e recollida artesanal da uva e a aplicación posterior de tecnoloxías de vangarda para a súa produción, mantendo unha calidade excepcional en todos os seus caldos.

    “Os viños de Arbo, nas súas distintas variedades, son o acompañamento ideal para toda clase de pratos. Por iso supoñen un magnifico complemento á coidada gastronomía da zona” , prosegue o rexedor.

    Do mesmo xeito que sucede co propio municipio, ofrecen magníficos contrastes. Variedades como o caíño, brancello, espadeiro e pedral, dan como froito un apetecible tinto. Albariño, Torrontés, Treixadura ou Loureiro, brindan viños brancos de exquisito padal e delicada fragrancia, monovarietales de albariño e polivarietales de albariño treixadura e loureira, que, do mesmo xeito que sucede cos demais brancos de Denominación de Orixe Rias Baixas, son secos, intensamente afrutados e cun retrogusto moi fino e prolongado.

    A ribeira do Miño e os viñedos configuran a paisaxe e descobren unha antiga historia; Pesqueiras e Viñas conviven desde hai séculos nunha perfecta harmonía natural, necesaria e complementaria. Entre o tempo que transcorría entre armar e levantar a rede na captura do peixe, os arbenses, aprendían a plantar, enxertar, podar.

    “A nosa gastronomía complétase cos mellores produtos da terra e, por suposto, cun bo viño. Cada final de verán, as nosas adegas recollen a uva de forma artesanal. O enoturismo é un dos nosos puntos fortes. O visitante goza tanto observando a vendima como catando un bo condado ou Albariño”, manifesta Horacio Gil.

    O enoturismo vívese en Arbo e, a través dos roteiros guiados polas adegas, o visitante poderá coñecer de primeira man, o labor tan interesante que realizan os adegueiros deste Municipio. Algunhas das adegas, están situadas en antigos pazos, casas señoriales…
    Na visita, non poden deixar de gozar do Enoturismo en Arbo: un turismo diferente, cheo de arraigamento, cultura e tradición.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.