A cinco meses do seu segundo mandato, o alcalde da Cañiza, Luis Piña, avanzou esta mañá que o goberno leva traballando intensamente para afrontar a delicada situación económica do Concello.
Esta situación é derivada dos 2.769.008,52 € en facturas a proveedores sen pagar (dende o ano 2014) que o Concello tivo que declarar ao Ministerio de Facenda no 2022 e 2023 e que agora teñen que devolverlle a razón de 46.000,00 € ao mes.
Para poder rebaixar esta cantidade a 23.000,00 €/mes ( o máximo que permite a Lei) o Concello ten que presentar ante este Ministerio un Plan de Saneamento Financeiro que terá que pasar pola actualización das ordenanzas fiscais, o recorte do gasto e a reducción da plantilla (amortización de prazas por xubilación nun prazo de tres a catro anos).
Luis Piña adiantou que o Goberno leva meses estudando a actualización da fiscalidade municipal. Taxas e impostos sen revisar nin actualizar dende hai anos e que nalgúns casos están conxelados dende o ano 2004, como é o Imposto de Vehículos.
Eliminación da débeda a proveedores
O Concello ten que facer fronte obrigatoriamente a un plan de Saneamento Financeiro, requerido por Hacienda, para rebaixar á débeda contraída co Ministerio de 2.769.008,52 € procedentes do pago de facturas a proveedores adeudada dende o ano 2014”.
Esta situación, provocada polos dous mecanismos de pago a proveedores que o Concello se viu obrigado a cumprir coa Axencia Tributaria (por presentar un período medio de pago das facturas a proveedores “superior a 60 días e excesivamente elevado de forma reiterada no tempo”), tivo como consecuencia a declaración de 2.769.008,52 € (1.149 facturas que sumaron un total de 1.240.415,52€ en 2022 e 2089 facturas que sumaron un total de 1.528.593,00€ en 2023).
Retencións do Ministerio de Facenda de 46.000€/mes
Facturas sen pagar que asumiu Facenda nos anos 2022 e 2023 pero que dende o pasado mes de xullo temos que devolverlle en forma de retencións, con cargo á participación do Concello nos Tributos do Estado.
Unha retención do 50 % que para o Concello supón deixar de cobrar cada mes un total de 46.000 € e anualmente 552.000,00 €.
A este respecto e segundo se recolle no artigo 117 da Ley de Presupuestos Generales del Estado 2023, esta retención do 50 % poderá ser reducida ata un 25 % en función das necesidades do Concello e sempre que a Corporación acredite a existencia de graves desfases de Tesourería.
Unha situación que a día de hoxe está sufrindo o Concello da Cañiza, motivado principalmente por ter conxeladas as actualizacións anuais das taxas e impostos dende hai máis dunha década (nalgúns casos 20 anos como o imposto de circulación de vehículos), á forte subida dos prezos do mercado debido á inflación e a inestabilidade internacional e tamén á masa salarial que ten que asumir o Concello .
Rebaixa da retención
Ante esta posibilidade, dende a Intervención Municipal, se solicitou o pasado 10 de outubro ao Ministerio a rebaixa desta retención ata un 25 %. Tendo en conta que o Concello cobra con cargo á participación dos Tributos do Estado 92.000,00 € ao mes, a concesión desta rebaixa ata o 25 % suporía cobrar 69.000,00 €, en vez dos 46.000,00 € que están aplicando dende o mes de xullo”.
A aplicación da retención do 25 % suporía unha perda de 23.000,00 € mensuais e 276.000,00 € anuais. Se o Ministerio de Hacienda non autoriza a rebaixa da porcentaxe, o Concello deixará de cobrar 552.000,00 € ao ano.
Condicións do Ministerio para a rebaixa
Pero para que o Ministerio de Hacienda conceda minorar a retención ao 25 % é obrigatorio presentar un Plan de Saneamento Financeiro, que terá que ser aprobado polo Pleno, que recolla unha serie de medidas que permita ao Concello cumprir co obxectivo de estabilidade financeira.
Entre estas medidas está a actualización das ordenanzas fiscais para o ano 2024 con revisións anuais, recortes no gasto corrente e revisión e amortización dos postos de traballo vacantes por xubilación ou outra causa. Medidas que permitan aprobar os orzamentos nos seguintes exercizos conseguindo equilibrar os gastos e ingresos.
Esforzo colectivo e colaboración
Con todo, o alcalde manifestou “que a actualización das taxas e impostos municipais non permitirán cubrir a totalidade dos costes e gastos derivados da prestación dos servizos públicos pero sí facer fronte á parte de minoración de recursos con cargo á Participación de Tributos do Estado”.
Unha situación complicada para o Concello e para a veciñanza que ademáis ven a sumarse á carestía da vida e á forte subida dos prezos do mercado que afecta directamente ao mantemento dos servizos públicos de carácter básico, polo que o Concello se ve na necesidade de actualizar os impostos e as taxas no vindeiro exercicio.
