8.3 C
Pontevedra
Xoves, 28 de Marzo de 2024
Máis
    HomeA ParadantaA CañizaA Cañiza xa dispón do skate park e pump track máis completo...

    A Cañiza xa dispón do skate park e pump track máis completo de Galicia

    Cos recursos do Plan Concellos da Deputación, o Concello da Cañiza conta xa co seu novo skate park e pump track, situado na rúa Silleda, a carón da Escola de Música municipal. A presidenta da institución provincial en funcións, Carmela Silva, visitou onte pola tarde acompañada do alcalde en funcións da vila, Luis Piña, o resultado desta actuación que acadou unha inxección de 290.000 € de fondos provinciais a través do Plan Concellos e que xa está a ser empregada pola cidadanía. Trátase, segundo sinalou o seu artífice, o técnico Álex Durán (responsable das probas do DMX do festival O Marisquiño), do skate park e pump track máis completo de toda Galicia.

    A presidenta provincial en funcións, Carmela Silva, puxo en valor este novo equipamento deportivo “do século XXI, clave fundamental para atraer e manter poboación en núcleos pequenos e rurais como A Cañiza”. Con estas instalacións, sinalou, “a vila estase a poñer no mapa destas novas modalidades deportivas, cunha ampla repercusión social que aumentará cando se celebre o I Pumptrack A Cañiza, en xullo, e que fará que milleiros de persoas se acheguen á Paradanta, impulsando o seu desenvolvemento a todos os niveis”.

    Pola súa banda o rexedor en funcións da vila, Luis Piña, amosouse “encantado” coa nova dotación e “ilusionado pola posta de longo que será a copa de Galicia en xullo”. Presumiu tamén do “mellor conxunto de skate park e pump track de Galicia, que mesmo segundo afirman persoas expertas ten a mellor rúa principal de toda España”. E recordou que “estamos recibindo comentarios de colectivos e deportistas de diferentes lugares, como Vigo e Ourense, asegurando que van achegarse regularmente porque non hai dotacións comparables a esta”.

    O skate park e pump track da Cañiza responde a un deseño seguro e ao aire libre. Con esta infraestrutura, a vila conta con instalacións públicas que ofertan novas disciplinas deportivas, amais de xerar un atractivo turístico máis dentro da comarca. A infraestrutura suma máis de 3.300 m2 para a práctica de deporte urbano, divididos no skate park (1.820 m2), o pump track (715 m2), zonas verdes (744 m2) e unha zona de acceso (26 m2) e o vindeiro 16 de xullo acollerá xa a súa primeira proba deportiva: o I Pumptrack A Cañiza, unha proba na especialidade de BTT Pump Track aprobada pola Federación Galega de Ciclismo.

    O skate park conta con diferentes tipos de planos inclinados e ramplas que ofrecen un amplo abanico de posibilidades de movementos, piruetas e acrobacias, para practicar distintas disciplinas como skate, bmx, scooter e roller. Pola súa banda, grazas ás ondulacións que compoñen o seu carril o pump track está deseñado para ter unha utilización fluída. Ademais as persoas usuarias poden realizar o percorrido co impulso da inercia, sen que teñan que dar pedaladas ou empuxe co pé.

    LIBROS

    A pegada de «Ronsel»

    A editorial Galaxia vén de recuperar a súa vella colección «Ronsel», concibida nos anos 80 para darlle cabida «a novas voces e a novas temáticas das nosas letras», en palabras da propia editorial. Daquela, foi o espazo no que se deron a coñecer algúns autores que, andado o tempo, acadarían sona no noso sistema literario, como foi o caso de Darío Xohán Cabana ou Miguel Anxo Murado. Nesta nova andaina e, polo de agora, estréase con dúas publicacións, pero anuncian novas sorpresas ao longo de todo este ano.

    Dores Tembrás, «Enxertos»

    A nostalxia é unha materia prima habitual á hora de escribir poesía, mais non fai falla chegar a tanto. Se, a cotío, esa nostalxia leva implícita certa dose de tristura morriñenta para lembrar tempos pretéritos, non sempre ten que ser así, como demostra Dores Tembrás no seu último poemario, «Enxertos». Dores mergúllase na súa propia memoria, na súa infancia na aldea e na mocidade urbanita, para poñer en práctica unha modalidade de nostalxia leda e luminosa, alonxada de tristuras e saudades

    Queridos Reis Magos…

    Nas cartas aos Reis Magos de Oriente nunca debe faltar unha boa dose de literatura, sexa cal sexa a idade do receptor. Neste andel, como facemos sempre, queremos aportar algunhas recomendacións dirixidas aos máis pequenos da casa.