Este domingo, 6 de agosto, a Asociación Cabalar Pedroso de Ribadil recuperou a celebración do curro, algo que non ocurría desde hacía 12 anos. A soleada xornada foi todo un éxito, contando co apoio do Concello, da veciñanza e do público asistente.
Unha festa chea de enxebrismo onde se reeditou esta tradición cabalar que naceu no 1º domingo do mes de agosto do ano 1994 e que estivo cargada de emotividade e respeto ás tradicións populares galegas, sobre todo no momento en que os organizadores lle renderon unha merecida homenaxe a Don Castor Pablo Rodríguez Pérez, fundador do Curro.
Dende o Concello, o alcalde felicitou “a todos os que integran a Asociación Cabalar Pedroso de Ribadil, organizadores do Curro nesta nova edición e ao resto dos colaboradores que fixeron posible que a xornada de onte se desenvolvera nun auténtico clima de festa e confraternidade”.
“Unha xuntanza na que se volveu a recuperar non só unha tradición popular, senón tamén a capacidade de congregar en torno a este evento a distintas xeracións. Xuntos para disfrutar do noso e compartilo cos demáis”. Afirmou o rexedor, facendo referencia ao “verdadeiro espíritu deste curro que ademáis o converte en senlleiro, con aceno de identidade propio” .
Luis Piña volveu a manifestar o “apoio incondicional e compromiso de colaboración do Concello da Cañiza con este Curro, en futuras edicións, así como con todas aquelas iniciativas que se sumen aos activos turísticos da Cañiza, e que redunden en beneficio do noso municipio”.
Unha xornada vibrante e emocionante
Como xa adiantaran os organizadores do evento na presentación do Curro o pasado 27 de xullo, a xornada de onte celebrouse nun ambiente de festa, campestre, enxebre, vibrante e emocionante que comezou ás 7 da mañá coa subida ao Curro á busca dos rabaños.
Durante toda a xornada se puido comer, beber, facerse con lembranzas e posar en photocall e sobre todo disfrutar do espectáculo que ofreceron os cabalos: nas montañas e no propio recinto.
Como todo curro que se preze, durante a xornada se sanearon os animais, colocaron os microchips e se desenvolveron “compras e vendas” entre os gandeiros. Todo isto nun ambiente amenizado con música tradicional e boa gastronomía da que deron boa conta os centos de veciños e visitantes.
O Curro non defraudou e despois de 12 anos, como tamén se dixo na presentación do evento “entre todos conseguimos que se convertera nun inesquecible día de romaría e festa e un espectáculo de colorido e bravura propio da nosa rexión”.
