O pasado 15 de decembro a empresa Galaicontrol S.L., encargada da redacción do proxecto de construcción desta importante rúa da Cañiza, entregou no Concello o traballo definitivo baixo o título «Humanización da rúa Antonio Facorro, dende a EP-5003 ata a N-120».
Un traballo de asistencia técnica por un importe de adxudicación de 44.588,50 €, subvencionado ao 90 % pola Deputación de Pontevedra, a través da Rede Ágora.
Unha axuda conseguida ao pertencer A Cañiza á Rede de Concellos Ágora polo Espazo Público da Deputación, que ten por obxectivo acadar unha mobilidade máis amable e a recuperación dos espazos públicos municipais.
Onte, o alcalde Luis Piña anunciou que “agora estamos traballando para conseguir fondos da Unión Europea que nos permitan afrontar os gastos da execución da obra que ascenden a 1.254.366,89 €. Desagregados en 871.148,61 € de execución material, 113.249,32 €, correspondentes ao 13 % de gastos xerais, 52.268,92 de beneficio industrial (6 %) e 217.700,04 € correspondentes ao 21 % de IVE”.
Unha obra que, segundo comunicou o rexedor, “terá que financiarse con fondos europeos e polo tanto executarse a medio prazo, pero o máis importante e que conta cun amplo beneplácito dos veciños e dos comerciantes”.
O proxecto
Abarca unha superficie de actuación de 4.105 m2, nun itinerario que conecta as zonas verdes da Praza Maior e o Parque Central.
A obra actuará sobre o mal estado dos pavimentos da calzada e das aceras que provocan incluso a entrada de augas nos baixos das edificacións. Instalación de marcas ranuradas e táctiles para mellor uso de invidentes, novos pasos peonís, mellor iluminación que, ademais, se soterrará para evitar os tendidos aéreos. Novos mobiliarios urbanos e xardinería, coa colocación de grande variedade de prantas e árbores.
Segundo o proxecto de humanización a rúa contempla un carril nunha única dirección, entrando pola N-120 ou pola rúa Botica en dirección á rotonda de entronque coa estrada provincial A Cañiza- Arbo. A circulación nas rúas Novas (Rosalía de Castro, Otero Pedraio, CAstelao e Curros Enríquez), mantense sen cambios.
Na rúa quedarán zonas de carga e descarga para facilitar o servizo do comercio local e un amplo espazo peonil. Destaca a alta calidade nos materiais utilizados para o embelecemento do espazo.
Un 50 % da obra actuará sobre os servizos soterrados: saneamentos, rede de abastecemento de augas, pluviais e comunicacións.
