Desde o pasado 1 de xuño, data na que o Concello de Mos abriu a listaxe municipal de demandantes de vivenda protexida, xa hai inscritos 60 veciños e veciñas interesados en optar a esta futura oportunidade residencial no municipio.
A listaxe municipal continuará activa para que se anote toda a veciñanza que o desexe e con estos 60 xa incritos procederase a formalizar inscrición no rexistro oficial autonómico de Vivenda Protexida de Galicia para que a Xunta inicie os trámites pertinentes a este respecto.
Nesta listaxe municipal poden apuntarse as persoas que desexen solicitar este tipo de inmobles incluídos no proxecto de impulso da vivenda protexida no Concello.
A listaxe municipal de demandantes de vivendas está xestionada polos servizos municipais e nela poden inscribirse os cidadáns interesados en solicitar o acceso a algunha das futuras vivendas que se desenvolvan a partir do proxecto do Concello.
Cómpre lebrar que a finais do pasado mes de maio o director xeral do IGVS, Heriberto García Porto, e a alcaldesa, Nidia Arévalo, acompañados de varios técnicos municipais, reuníronse para estudar as posibilidades en materia residencial. Durante a xuntanza, Xunta e Concello de Mos, analizaron as alternativas para desenvolver vivendas protexidas no municipio.
Durante a reunión, continuación da mantida o pasado mes de marzo, analizáronse posibles alternativas de solo para a construción de vivendas protexidas en Mos, tanto de promoción pública como privada. A tal fin, estudáronse diferentes posibilidades de novos desenvolvementos de solo residencial.
