No mes de xuño de 2019, recen chegado o Goberno que preside Digna Rivas ao Concello, unha das súas primeiras iniciativas, desenvolvida a través do Servizo de Normalización Lingüística, foi a de perpetuar o nome de persoeiros ilustres de Redondela, ou que mantiveron relación co municipio, a través de placas situados nos bancos da Alameda Castelao e a Alameda Rosalía de Castro de Chapela.
Nunha primeira quenda, nomes de ámbito local como Casto Sampedro ou Reveriano Soutullo e intelectuais ou artistas que, dunha ou doutra maneira, falaron de Redondela, como Julio Cortázar ou Dalí tiveron o seu sitio na Alameda Castelao.
Do mesmo xeito, na Alameda de Rosalía de Castro, en Chapela, exhibía placas de persoas vinculadas a esta parroquia, coma Xela Arias ou Álvaro Cunqueiro, director de Faro de Vigo cando abriu as súas oficinas en Chapela.
Agora, o Goberno local continúa esa iniciativa engadindo novos nomes aos bancos para que, a través deles, as veciñas e veciños coñezan máis sobre os homes e mulleres que lles dan nome e quede perpetuada a súa memoria.
Nesta segunda quenda, os bancos lembrarán os nomes de Alejandro Otero (1888-1953) Médico, catedrático e reitor da Universidade de Granada. Deputado socialista morto no exilio; Telmo Bernárdez (1885-1936) Médico, líder agrarista e alcalde de Redondela. Fusilado en 1936; José Figueroa (1880-1912) Emigrante no Brasil. Filántropo e benfeitor de Redondela; Ernestina Otero (1890-1956) Profesora de mestres. Pedagoga entre as primeiras de Galicia; Paulina Sánchez (1898-1971) Mestra e activista cultural; Antonia Míguez Lago (1917-2001) Das primeiras mulleres sindicalistas de Redondela; Lois Pereiro (1958-1996) Poeta de culto. Dedicóuselle o Día das Letras Galegas 2011; Mulleres solidarias de San Simón (1936-1943) A todas as mulleres de Redondela que practicaron a solidariedade cos presos políticos detidos na illa de San Simón e no barco Upo Mendi; Juana Domínguez Núñez (1884-1967) Dona da Taberna Nador onde nunca faltou pan para quen tiña fame; Ignacio Ramonet (1943) Xornalista e profesor nado en Redondela. Director de Le Monde Diplomatique; A estirpe Cal (s. XX) Fotógrafos da vida e alma de Redondela comprometidos co pobo galego; Rita Regojo (1929-2011) Fundadora da ONG Aldeas Infantís de Galicia; Felipe Cordero Carrete (1895-1988) Nado en Redondela e emigrado en América, foi membro do Seminario de Estudos Galegos; Josefa Puga Docampo (1919-1995) Muller represaliada polo franquismo que mantivo a dignidade ante as aldraxes sufridas; Suso Vaamonde (1950-2000) Veciño de Chapela que destacou dentro do movemento de Voces Ceibes