Os concelleiros do goberno municipal do Porriño Sergio Casal, David Alonso e Cami Moreira recibiron hoxe venres 16 de xullo, ao redor das 13 horas, no salón de plenos do Concello aos peregrinos que portan a “Mochila da Luz” en homenaxe ás vítimas da Covid-19.
Os peregrinos que están a realizar o Camiño Portugués portan por relevos a “Mochila da Luz” desde que partiu de Oporto o pasado luns 12 de xullo. Precisamente hoxe venres, estes peregrinos, completarán a etapa Tui-Porriño.
A coordinadora da iniciativa, Susi Soto, e un grupo de peregrinos de varias nacionalidades serán os encargados de transportar a “Mochila da Luz” ata Porriño. Este ano 2021 a mensaxe a transmitir “é de esperanza, da luz da esperanza dos nosos maiores por ser o primeiro grupo de poboación en ter recibida a vacina”, segundo manifestan os promotores da “Mochila da Luz” nas súas redes sociais.
